दुर्घटना म घायल एसईसीएल कर्मचारी मनके हाल-चाल जाने खातिर अस्पताल पहुंचिस कैबिनेट मंत्री

अंजोर.अम्बिकापुर 6 सितंबर। छत्तीसगढ़ शासन के नगरीय प्रशासन अउ विकास अउ जिला के प्रभारी मंत्री डॉ शिवकुमार डहरिया, स्कूल शिक्षा मंत्री डॉ प्रेमसाय सिंह टेकाम अउ खाद्य मंत्री अमरजीत भगत सोमवार के बस दुर्घटना के सेती अम्बिकापुर के एक निजी अस्पताल म भर्ती पीड़ितमन के हाल-चाल जाने खातिर अस्पताल पहुंचिस। ओमन बस दुर्घटना म घायल अउ उंकर घर वाला ले बातचीत करके कुशल-क्षेम पूछिस। येकर पाछु ओमन हॉस्पिटल प्रबंधन ले बढि़या इलाज के खातिर स्वास्थ्य सुविधा उपलब्ध कराये निर्देशित करिन। 

जानबा होवय के पाछु दिन सूरजपुर जिला म एसईसीएल के 43 कर्मचारी ले भरे बस कंपनी के भटगांव मुख्यालय ले महान कोल माइन्स जात रिहिस। जब बस सुखदेवपुर गांव के पास एक पुल म पहुंचीस त बस पुल के रेलिंग ल तोड़त नदी म जा गिरीस। जेमा लगभग 43 कर्मचारी मन के हताहत होए के सूचना मिले रिहिस। जेमे ले 18 लोगन ल अम्बिकापुर के जीवन ज्योति नर्सिंग होम भेजे गे रिहिस। निरीक्षण के बखत लुण्ड्रा विधायक डॉ प्रीतम राम, जिला पंचायत के अध्यक्ष श्रीमती मधु सिंह, जिला पंचायत सदस्य राकेश गुप्ता, कलेक्टर संजीव कुमार झा, एसपी अमित तुकाराम काम्बले सहित आन जनप्रतिनिधि उपस्थित रिहिस।