गंगरेल बांध ले सिंचाई के खातिर अभी पंदरा दिन अऊ दे जा सकही पानी, विधायक दल ह जलाशय म पानी के लिस आरो

 

अंजोर.धमतरी, 06 सितम्बर। प्रदेश के वरिष्ठ विधायक मनके दल ह धमतरी जिला के गंगरेल पहुंचके जिला के जलाशय म जलभराव के स्थिति के जानकारी लिस। ये मउका म कोंडागांव विधायक मोहन मरकाम, रायपुर ग्रामीण विधायक सत्यनारायण शर्मा, अभनपुर विधायक धनेन्द्र साहू अउ बस्तर विधायक लखेश्वर बघेल ह जल संसाधन विभाग के रेस्ट हाउस म विभागीय अधिकारी मनके बइठक लिस। ए बखत कलेक्टर पी.एस. एल्मा ह बताइन के पाछु कुछ सप्ताह ले बरसात होए ले फिलहाल खेत ल पानी मिलत हावय। ओमन किहिन के जिला के चार जलाशय म अभी औसतन 46 प्रतिशत जलभराव हावय, जेमा रविशंकर सागर गंगरेल जलाशय म 42 प्रतिशत, दुधावा म 29 प्रतिशत, सोंढूर म 52 अउ बाबू छोटेलाल श्रीवास्तव मुरूमसिल्ली जलाशय म 62 प्रतिशत जलभराव हावय।

कार्यपालन अभियंता जल संसाधन एमडी महंत ह बताइन के अभी के बेरा म जिला के चारों जलाशय म 21.17 टीएमसी जलभराव हावय, जेमा 12.85 टीएमसी पानी भिलाई इस्पात संयंत्र, नगर निगम रायपुर अउ धमतरी के पेयजल अउ निस्तारी के खातिर आरक्षित हावय। कृषि के खातिर 8.32 टीएमसी जल के उपलब्धता हावय। ओमन बताइन के पाछु सप्ताह ले होत बरसात ले गंगरेल जलाशय म 3348 क्यूसेक, मुरूमसिल्ली म 926, दुधावा म 197 अउ सोंढूर जलाशय म 1355 क्यूसेक पानी के आवक अभी के बेरा म बने हावय। जिला के वार्षिक औसत वर्षा 1240 मिलीमीटर हावय, जबकि आज तक मात्र औसत बरसात 700 मिलीमीटर होए हावय। कार्यपालन अभियंता ह बताइन के रविशंकर जलाशय ले सिंचाई के खातिर अभी भी दू सप्ताह तक पानी छोड़े जाये के स्थिति हावय।