माँ विंध्यवासिनी बिलाईमाता मन्दिर ट्रस्टी मन मुख्यमंत्री ले करिस मुलाकात

अंजोर.रायपुर, 24 सितंबर। मुख्यमंत्री दाऊ भूपेश बघेल ले माँ विंध्यवासिनी बिलाइमाता मन्दिर ट्रस्ट, धमतरी के सदस्य मन ह सौजन्य मुलाकात करके ओला 26 सितम्बर के आयोजित वृक्षारोपण कार्यक्रम के खातिर आमंत्रित करिन। ए मउका म मुख्यमंत्री ह ट्रस्ट के सदस्य मन ल अपन तनि ले अपराजिता, घृतकुमारी, अरेलिया अउ पिसलिली के पौधा भेंट करिस।

ट्रस्ट के अध्यक्ष आनन्द पवार ह बताइन के ट्रस्ट डहर ले संचालित मोक्षधाम म 26 सितंबर के पौधा दान अउ वृक्षारोपण के वृहद कार्यक्रम आयोजित करे गे हावय। श्री पवार ह मुख्यमंत्री ल बताइन के मोक्षधाम म कोरोना आपदा के बखत ट्रस्ट के सदस्य मन ह मृतक के घर वाला ल शवदाह के खातिर जरूरी सुविधा उपलब्ध कराये म मदद देथे। अभी के बेरा म ट्रस्ट डहर ले मोक्षधाम म बाउंड्रीवाल, शेड निर्माण, शवदाहगृह, प्रतीक्षालय के नवनिर्माण करे जात हावय। दाह संस्कार के खातिर लकड़ी के जगह गौ काष्ठ भी उपलब्ध कराये जात हावय। मुख्यमंत्री श्री बघेल ह ट्रस्ट के सदस्य मन डहर ले समाज हित म निःस्वार्थ भाव ले करे जात बुता के खातिर उंकर सराहना करिस।