राष्ट्रीय सेवा योजना स्थापना दिवस : सर्वश्रेष्ठ संस्था, सर्वश्रेष्ठ कार्यक्रम अधिकारी अउ सर्वश्रेष्ठ स्वयंसेवक ल पुरस्कृत करिस राज्यपाल

अंजोर
0

अंजोर.रायपुर, 24 सितंबर। राज्यपाल सुश्री अनुसुईया उइके ह राष्ट्रीय सेवा योजना (एनएसएस) के स्थापना दिन के मउका म आयोजित राज्य स्तरीय सम्मान समारोह म सर्वश्रेष्ठ संस्था, सर्वश्रेष्ठ कार्यक्रम अधिकारी अउ सर्वश्रेष्ठ स्वयंसेवक ल पुरस्कृत करिन। ए मउका म ओमन किहिन के मोला गर्व हावय के मैं एनएसएस के स्वयंसेवक रेहे हावं। ए संस्था म बुता करे के सेती मोर म समाज के खातिर बुता करे के जज्बा पैदा होइस। ए संस्था म बुता करे के बाद एक जुझारूपन के भावना विकसित होए हावय ये भावना ही युवा मन ल आगू बढ़े म मदद करथे। मोरो म ये भावना एनएसएस ले आइस अउ जेन सरलग आगू बढ़े के प्रेरणा देत रिहिस, जेकर सेती मैं विधायक, मंत्री, राष्ट्रीय महिला आयोग के सदस्य, राष्ट्रीय अनुसूचित जनजाति आयोग के उपाध्यक्ष अउ राज्यपाल के पद तक पहुंच पाये हावं। 

संसदीय सचिव अउ विधायक विकास उपाध्याय ह किहिन के एनएसएस के स्थापना सन 1969 म ए उद्देश्य ले करे गिस के देश म अइसे युवा मन के फौज हमेशा तइयार मिले जेन संकट या प्राकृतिक आपदा के समय सेवा करे के खातिर तैनात राहय। ओमन किहिन के आज एनएसएस ले 01 लाख ले जादा युवा जुड़े होए हावयं, जेन कोनो भी संकट या जरूरत के समय आगू आके बुता करत हावयं। ओमन किहिन के कोविड-19 के समय जब बड़ संख्या म प्रवासी मजदूर हमर प्रदेश म आएस, त ओला उंकर घर भेजे अउ उंकर हर रकम ले मदद के खातिर एनएसएस के स्वयंसेवक ह जरूरी भूमिका निभाईस, इहां तक आक्सीजन, दवई मन के बेवस्था करना, अस्पताल म भरती कराना, हर परिस्थिति म आगू बढ़के बुता करिन। 

पंडित रविशंकर शुक्ल विश्वविद्यालय के कुलपति केशरीलाल वर्मा ह किहिन के विश्वविद्यालय के पाठ्यक्रम म एनएसएस ल एक वैकल्पिक विषय के रूप म जोड़े जात हावय। पढ़ईया येकर वैकल्पिक विषय के रूप म अध्ययन कर पाही। ये मउका म उच्च शिक्षा विभाग के विशेष सचिव भुवनेश यादव अउ उच्च शिक्षा विभाग के आयुक्त श्रीमती शारदा वर्मा ह भी अपन संबोधन दिस। कार्यक्रम म सर्वश्रेष्ठ संस्था के रूप म कॉलेज स्तर म शासकीय स्नातकोत्तर कॉलेज महासमुंद, विद्यालय स्तर म शासकीय उच्चतर माध्यमिक विद्यालय तारापुर, जिला-रायगढ़ अउ 04 कार्यक्रम अधिकारी अउ 24 स्वयंसेवक ल पुरस्कृत करिन। कार्यक्रम म राष्ट्रीय सेवा योजना के स्वयंसेवक अउ उंकर परिजन, शिक्षकगण उपस्थित रिहिस।

एक टिप्पणी भेजें

0टिप्पणियाँ

सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।

एक टिप्पणी भेजें (0)

#buttons=(Accept !) #days=(20)

Our website uses cookies to enhance your experience. Check Now
Accept !