सीतापुर के गांव नवाटोली म भालू के हमला, सियनहिन के इलाज अउ मुआवजा खातिर मंत्री अमरजीत भगत के निर्देश

अंजोर.सीतापुर, 12 जुलाई 2021। सीतापुर ले ग्रामपंचायत रजौटी के आश्रित गांव नवाटोली म भालू के हमला ले घायल गांव वाला के स्वास्थ्य के जानकारी लेवत मंत्री अमरजीत भगत ह अधिकारी मन ले घायल के तुरते उपचार कराये के निर्देश अधिकारी दिस। जानबा होवय के रविवार संझा के गांव नवाटोली म भालू घूस आए रिहिस अउ 65 वर्षीया महिला ल हमला करके ओला घायल कर दे रिहिस। भालू ल भगाये कोशिश म दू युवा भी घायल होगे हावयं। मंत्री श्री भगत ह ए संबंध म तुरते मुख्य कंजर्वेटिव वन अधिकारी ले भी बात करिस अउ भालू ल गांव ले बाहिर निकाले के खातिर लघियात बचाव दल भेजे के निर्देश भी दिस।

अधिकारी मन ह बताइन के भालू के हमले ले घायल गांव वाला के सीतापुर के सामुदायिक स्वास्थ्य केंद्र म इलाज करे जात हावय। मंत्री भगत ह जरूरत पड़े म घायल गांव वाला के उपचार के खातिर अंबिकापुर ले जाये ल किहिन। श्री भगत ह घायल मनला उचित मुआवजा दे के खातिर चीफ कंजरवेटर फॉरेस्ट ऑफिसर के निर्देशित करिन। अधिकारी मन ह बताइन के भालू ल गांव ले जंगल के तनि भगा दे गे हावय। वन विभाग के अमला भी जंगल के आसपास तैनात हावय, ताकि भालू फेर वापस गांव तनि नी आ सके।