राजीव गांधी किसान न्याय योजना : समिलहा खातेदार किसान ल अब सिर्फ देना होही स्वयं के घोसना पत्र, मक्का अउ कोदो-कुटकी, सोयाबीन, अरहर, गन्ना बर तको पंजीयन जरूरी

अंजोर.रायपुर, 16 जुलाई 2021। राजीव गांधी किसान न्याय योजना के गाइडलाईन म होए आंशिक संशोधन ले राज्य के लाखों किसान मन के राहत मिले हावय। ए योजना के तहत संयुक्त खातेदार किसान मन ल पंजीयन के खातिर आवेदन चिट्ठी के संग सहमति सह-शपथ पत्र दे के बाध्यता ल खतम करत, छत्तीसगढ़ सरकार ह किसान मन ल कचहरी अउ नोटरी के चक्कर अउ करोड़ों रूपिया के अनावश्यक व्यय भार ले राहत दे हावय। इहां ये जानबा होवय के राजीव गांधी किसान न्याय योजना के तहत पंजीयन के खातिर संयुक्त खातेदार किसान मनके शपथ पत्र दे के प्रावधान ए योजना के गाइडलाईन म रखे गे रिहिस। शपथ पत्र बनवाने म किसान मन ल आत दिक्कत अउ अनावश्यक रकम खर्च होए के मामला जब मुख्यमंत्री दाऊ भूपेश बघेल के संज्ञान म आइस त ओमन कृषि मंत्री रविन्द्र चौबे ल योजना के गाइडलाईन म यथा संभव संशोधन करके किसान मन ल राहत दे के निर्देश दे रिहिस।

मुख्यमंत्री श्री बघेल के निर्देश के परिपालन म कृषि विभाग मंत्रालय डहर ले राजीव गांधी किसान न्याय योजना के गाइडलाईन म आंशिक रूप ले संशोधन करके किसान मन के अब पंजीयन कराये के खातिर शपथ पत्र दे के बाध्यता ल खतम करके दे गे हावय। संयुक्त खातेदार किसान मन ल अब पंजीयन के खातिर सिर्फ स्व-घोषणा पत्र देना होही। संयुक्त खातेदार किसान मन के पंजीयन नंबरदार के नाम ले होही। जानबा होवय के राजीव गांधी किसान न्याय योजना के जारी गाईडलाइन म संयुक्त खातेदार किसान मनके पंजीयन के खातिर आवेदन पत्र के संग सबो खाताधारक के सहमति सह-शपथ पत्र अउ आन जरूरी अभिलेख प्रस्तुत करे के प्रावधान रखे गे रिहिस, जेला अब विलोपित करके दे गे हावय।

छत्तीसगढ़ शासन के कृषि मंत्रालय डहर ले ए संबंध म आज जारी संशोधित आदेश के तहत राजीव गांधी किसान न्याय योजना के लाभ ले के खातिर अइसे किसान मन के जेन मन खरीफ साल 2020-21 म न्यूनतम समर्थन कीमत म धान बेचे के खातिर पंजीयन कराइन रिहिस, वो किसान मन ल योजनांतर्गत पंजीयन कराये के जरूरत नइ हावय। खरीफ के प्रमुख फसल मक्का, कोदो-कुटकी, सोयाबीन, अरहर अउ गन्ना उत्पादक किसान मनके योजनांतर्गत पंजीयन कराना हावय। खरीफ साल 2020-21 म जेन रकबा ले किसान डहर ले न्यूनतम समर्थन कीमत म धान बेचे गिस, यदि वो ह वो रकबे म धान के बदला योजना म सामिल आन फसल लगात हावय, त ओला योजनांतर्गत पंजीयन कराना होही। किसान राजीव गांधी किसान न्याय योजना के लाभ के खातिर पोर्टल म 30 सितंबर तक पंजीयन करा सकही।