राज्य महिला आयोग म ए महीना रायपुर अउ बस्तर संभाग के प्रकरण के होही जनसुनवाई

अंजोर.रायपुर, 01 जुलाई 2021। छत्तीसगढ़ राज्य महिला आयोग म प्रकरण के सुनवाई फेर शुरू होवत हावय। आयोग के अध्यक्ष डॉ. किरणमयी नायक जुलाई महीना म रायपुर अउ बस्तर संभाग म महिला मन के उत्पीड़न ले संबंधित प्रकरण के सुनवाई करही। जुलाई के पहिली सप्ताह म रायपुर संभाग के प्रकरण के सुनवाई अउ द्वितीय सप्ताह म जगदलपुर, कांकेर जिला के मामला के सुनवाई होही। लॉकडाउन के सेती पाछु अप्रैल महीना ले प्रकरण म सुनवाई स्थगित रिहिस। 

राजधानी के शास्त्री चौक के राज्य महिला आयोग कार्यालय म 2 ले 3 जुलाई अउ 6 ले 8 जुलाई तक बिहनिया 11 ले संझा 5 बजे तक कुल 5 दिन रायपुर संभाग ले संबंधित मामला के जनसुनवाई करे जाही। राज्य महिला आयोग के सचिव ह बताइन के सुनवाई के बखत सबो पक्षकार ल अपन करार समय म उपस्थित होना अउ सोशल डिस्टेसिंग के पालन करे ल किहिन। पक्षकार ल कोरोना संक्रमण ले सुरक्षा के खातिर चेहरा, मुंह अउ नाक के ढकत तीन लेयर वाला मास्क या मोटा कपड़ा के रूमाल बांध के आही। आयोग म सुनवाई के बखत पक्षकार खातिर सेनेटाईजर अउ आन सुविधा के बेवस्था करे जाही।