अंजोर.कांकेर, 21 जुलाई। अंतागढ़ विधानसभा क्षेत्र के विधायक अनूप नाग, जिला के कलेक्टर चन्दन कुमार, पुलिस अधीक्षक शलभ सिन्हा अउ जिला स्तरीय अधिकारी मन नक्सल प्रभावित क्षेत्र आमाबेड़ा म बुधवार के जनचौपाल आयोजित करिन। जेमा गांव वाला के समस्या सुलिस, शिविर म 111 आवेदन मिलिस जेकर निराकरण के खातिर कार्यवाही करे गिस। ए मउका म विधायक अनूप नाग ह गांव वाला ल संबोधित करत किहिन के स्थानीय समस्या के निराकरण के खातिर आज आमाबेड़ा म जन चौपाल सबो अधिकारी मौजूद हावयं, आप अपन समस्या के रखव, जेकर निरकारण करे के प्रयास होही। आमाबेड़ा ले कांकेर अउ अंतागढ़ ले आमाबेड़ा तक सड़क निर्माण बुता ल गति दे जाही। क्षेत्र के निवासी मन के बैकिंग समस्या के हल करे के खातिर आमाबेड़ा म ग्रामीण बैंक खोले के गंभीर प्रयास करे जात हावय। ओमन बताइन के क्षेत्र म पेय जल के समस्या ल हल करे के खातिर उंकर डहर ले 33 नग नलकूप खनन कराये गे हावय, येकर अलावा 17 नग पानी टैंकर भी सुदूर के गांव म उपलब्ध कराये गयें हावय, 16 नवा आंगनबाड़ी भवन बनाये गे हावय, येकर अतिरिक्त 30 नवा आंगनबाड़ी भी स्वीकृत करे गे हावय। 08 सीसी रोड अउ 04 रंगमंच अउ 04 सामुदायिक भवन बनाये गयें हावयं अउ 04 नग वाटर कुलर भी उपलब्ध कराये गे हावय।
अइसने स्कूल म अतिरिक्त कक्ष अउ आहाता निर्माण करे गे हावय। ए रकम ले आमाबेड़ा क्षेत्र म लगभग 02 करोड़ 40 लाख 03 हजार रूपिया के निर्माण बुता कराये गयें हावयं। गांव वाला के मांग म उंकर डहर ले आमाबेड़ा अउ बडेतेवड़ा म हाई मास्क लाईट लगाये, आमाबेड़ा म स्वागत द्वार लगाये, पंचायत अर्रा म सामुदायिक भवन के निर्माण कराये अउ मातला (अ) म पानी टंकी अउ सामुदायिक भवन के निर्माण कराये के घोषणा करे गिस। जन चौपाल कार्यक्रम म विधायक अनूप नाग डहर ले क्षेत्र के किसान मन ल कृषि उपकरण अउ बीजहा बांटे गिस। जिला पंचायत के पहिली अध्यक्ष श्रीमती सुभद्र सलाम ह किहिन के क्षेत्रीय समस्या के हल करे के खातिर आमाबेड़ा म जन चौपाल आयोजित करे गे हावय। आप निःसंकोच होके अपन समस्या रखव, जेकर नियमानुसार निराकरण के प्रयास करे जाही।
कलेक्टर चन्दन कुमार ह किहिन के आमाबेड़ा ले कांकेर अउ अंतागढ़ ले आमाबेड़ा मार्ग के निर्माण बुता के पूरा कराये के खातिर जिला प्रशासन गंभीर हावय। क्षेत्र म शतप्रतिशत संस्थागत जचकी अउ टीकाकरण बुता हो, गांव वाला के स्वास्थ्य सुविधा मिले, येकर खातिर जिला प्रशासन स्वास्थ्य क्षेत्र के मजबूत करे के प्रयास करत हावय, संग ही शिक्षा के क्षेत्र ल भी मजबूत करे जाही। क्षेत्र के विकास के खातिर शासन-प्रशासन प्रतिबद्ध हावय, आने वाला समय म ए अंचल म सड़क सहित निर्माण बुता के पूरा करे जाही। ओमन किहिन के आमाबेड़ा म बैंक खोले के प्रयास करे जात हावय। जन चौपाल ल जनपद पंचायत अंतागढ़ के अध्यक्ष बद्रीनाथ गावड़े, उपाध्यक्ष भवन जैन, जिला पंचायत सदस्य श्रीमती श्यामा पट्टावी के अलावा किशोर मरकाम, मुकेश ठक्कर, दुर्गेश ठाकुर, सहदेव गोटा, रमेश मण्डावी ह तको संबोधित करिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।