Rajnandgaon News : कुपोषण अउ एनेमिक ल दूरिहाए खातिर लइका अउ महतारी के देखभाल जरूरी : कलेक्टर

अंजोर.राजनांदगांव, 21जुलाई। सुदूर वनांचल क्षेत्र विकासखंड मानपुर के गांव औंधी म सघन सुपोषण अभियान ले अति गंभीर कुपोषित लइका के दे जाये वाला भोजन अवलोकन करिन कलेक्टर तारन प्रकाश सिन्हा। ओमन आंगनबाड़ी कार्यकर्ता डहर ले रेडी-टू-इट ले तइयार करे भोजन ल चिखके बढ़ई करिन। किहिन के लइका ल रेडी-टू-इट ले आने-आने रकम ले पकवान बनाके खिलावे, जेकर ले लइका खाए म रूचि लेही। ओमन केन्द्र म पहुंच के गंभीर कुपोषित लइका के अभिभावक ले गोठबात करके उंकर सही पोषण के खातिर अवगत कराइन। ओमन किहिन के लइका ल कुपोषण ले दूरिहा करे के खातिर दिन म थोड़ा-थोड़ा भोजन चार ले पांच बार खिलावे अउ समय-समय म स्वास्थ्य जांच जरूर करावे। ओमन आंगनबाड़ी कार्यकर्ता ले किहिन के कुपोषण अउ एनीमिया के दूरिहा करे के खातिर लइका के संग महतारी मन के देखभाल करना जरूरी हावय। ओला सही पोषण अउ दवई उपलब्ध कराये जाएं। कुपोषण ल दूरिहा करे के खातिर सरलग बुता करें। ओमन आंगनबाड़ी कार्यकर्ता ले महतारी मन अउ लइका ल कुपोषण ले दूरिहा करे के खातिर वितरण करे जाये वाला खाद्य सामग्री अउ समय-समय म स्वास्थ्य जांच के जानकारी लिस। ओमन किहिन के कुपोषित लइका के खातिर रेडी-टू-इट ले सूखा सामग्री बनाके बांटे करें।

बताइन के सघन सुपोषण अभियान ले कुपोषित लइका के पोषण के खातिर पौष्टिक भोजन खिलाये जात हावय। येकर ले गंभीर कुपोषित लइका के चयन करके एला दूरिहा करे के खातिर विशेष रूप ले पौष्टिक आहार दे जात हावय। येकर संग ही उंकर अभिभावक ल रोज भोजन म दे जाये वाला आहार के बारे म जानकारी दे जात हावय। ए बखत परियोजना मानपुर के साल्हेभट्टी सेक्टर नवागढ़, नलकसा, गुड़ारास, वारकुंजी, हल्बाबडगांव के लइका अउ उंकर अभिभावक ल भोजन खिलाके कुपोषण के प्रति जागरूक करिन। ए मउका म जिला पंचायत सीईओ लोकेश चंद्राकर, एसडीएम मानपुर राहुल रजक, जनपद सीईओ डीडी मंडले, तहसीलदार सुरेन्द्र उर्वशा, नायब तहसीलदार श्रेजल साहू, सीडीपीएस श्रीमती अर्चना सहित आन अधिकारी उपस्थित रिहिस।