हाट-बाजार म तको मिलही सरलग स्वास्थ्य सेवा : मुख्यमंत्री दाऊ भूपेश बघेल

अंजोर.रायपुर, 03 जुलाई 2021। मुख्यमंत्री भूपेश बघेल ह स्वास्थ्य विभाग के समीक्षा बइठक म ग्रामीण अंचल म लोगन ल सहजता ले स्वास्थ्य सेवा मुहैया कराये के उद्देश्य ले हाट-बाजार क्लिनिक योजना के प्रभावी क्रियान्वयन सुनिश्चित करे के निर्देश दिस। ओमन किहिन के राज्य के सुदूर ग्रामीण अंचल के हाट-बाजार म सरलग रूप मेडिकल टीम जाए, लोगन के स्वास्थ्य परीक्षण अउ उपचार होवे, ओला फोकट म दवाएं मिले। येकर खातिर पर्याप्त प्रबंध करे जाना चाही। 

मुख्यमंत्री ह हाट-बाजार क्लिनिक के खातिर जरूरत अनुसार डॉक्टर मन अउ स्वास्थ्य कर्मी के भरती अउ एम्बुलेंस वाहन के इंतजाम करे के निर्देश दिस। मुख्यमंत्री ह किहिन के हाट-बाजार क्लिनिक योजना ल मजबूत करे ले कोरोना महामारी के रोकथाम म भी मदद मिलही। मुख्यमंत्री ह बइठक म कोरोना के तीसरा लहर के रोकथाम के खातिर राज्य म करे जात स्वास्थ्यगत तइयारी के भी गहन समीक्षा करिस अउ किहिन के येकर खातिर फंड के कमी नइ होही। 

बइठक म स्वास्थ्य मंत्री टी.एस. सिंहदेव, कृषि अउ जल संसाधन मंत्री रविन्द्र चौबे, मुख्य सचिव अमिताभ जैन, अपर मुख्य सचिव सुब्रत साहू, प्रमुख सचिव स्वास्थ्य डॉ. आलोक शुक्ला अउ सचिव सुश्री सहला निगार, विशेष सचिव सी.आर. प्रसन्ना, एन.एच.एम. के संचालक डॉ. प्रियंका शुक्ला, सीजीएमएससी के प्रबंध संचालक के कार्तिकेय गोयल सहित आन वरिष्ठ अधिकारी उपस्थित रिहिस।

मुख्यमंत्री ह कोरोना के तीसरा लहर के रोकथाम के खातिर जिला अस्पताल ले लेके सामुदायिक स्वास्थ्य केन्द्र म ऑक्सीजन बेड, आईसीयू बेड, वेंटिलेटर, ऑक्सीजन सप्लाई के खातिर प्लांट, ऑक्सीजन सिलेण्डर उक के बेवस्था सुनिश्चित करे के निर्देश दिस। बइठक म खूबचंद बघेल आयुष्मान भारत योजना के राज्य के लोगन के लाभ सुनिश्चित करे के संबंध म जरूरी कार्यवाही के भी निर्देश दे गिस। बइठक म जानकारी दीस के जिला चिकित्सालय, सामुदायिक स्वास्थ्य केन्द्र सहित 179 शासकीय अस्पताल म ओटी, लेबर रूम, ब्लड बैंक अउ हमर लैब के स्थापना सहित कोरोना के तीसरा लहर के रोकथाम के खातिर जरूरी व्यवस्था सुनिश्चित करे जात हावयं। मुख्यमंत्री ह जरूरत नुसार इहां मेडिकल स्टाफ के बेवस्था के भी निर्देश दिस। बइठक म नर्सिंग होम एक्ट म छूट के मांग ल लेके गोठबात करे गिस। 

बइठक म जानकारी दीस के कोरोना पीड़ित मन के इलाज के खातिर बीते छह महीना म वेंटीलेटर के संख्या 280 ले बढ़ के 723, आईसीयू बेड 406 ले बढ़ के 629, ऑक्सीजन कांसंट्रेटर 1061 ले बढ़ के 5142, ऑक्सीजन सिलेण्डर 5203 ले बढ़ के 14,744, ऑक्सीजन प्लांट 6 ले बढ़ के 23 अउ मल्टी पैरा मॉनिटर के संख्या 624 ले बढ़ के 1124 हो गे हावय। कोरोना के तीसरा लहर के मद्देनजर सबो पीएचसी म 5 ऑक्सीजन कांसंट्रेटर, 15 ऑक्सीजन बेड, 15 जंबो सिलेण्डर, 4 आईसीयू बेड के बेवस्था सुनिश्चित करे जात हावय। सबो जिला अस्पताल म ऑक्सीजन युक्त बिस्तर, 30 आईसीयू बेड वेंटीलेटर सहित 2 शिशु वेंटीलेटर अउ ऑक्सीजन आपूर्ति करे जात हावय। इही रकम ले चिकित्सा कॉलेज मन म भी जरूरी व्यवस्था करे जात हावयं।