अंजोर.रायपुर, 01 जुलाई 2021। छत्तीसगढ़ राष्ट्रपिता महात्मा गांधी के स्वावलंबी गांव के सपना ल साकार करे के दिशा म तेजी ले आगू बढ़ हावय। नरवा, गरवा, घुरूवा, बाड़ी योजना के तहत गउठान म संचालित आने-आने आर्थिक गतिविधी जइसे महिला स्व सहयता समूह डहर ले वर्मी कम्पोस्ट के उत्पादन, बाड़ी म सब्जी के उत्पादन सहित आन आर्थिक गतिविधी ले महिला मन अउ गांव वाला के रोजगार के संग आमदनी के जरिया मिलगे हावय अउ वो स्वावलंबन तनि बढ़त हावयं। ये बात ल आज मुख्यमंत्री अपन निवास कार्यालय म आयोजित वर्चुअल कार्यक्रम म खरीफ फसलल पशु मन के चराई ले बचाये खातिर रोका-छेका अभियान के वर्चुअल शुभारंभ करत बखत किहिन। ओमन आगू किहिन के गांव म बइठक करके रोका-छेका अभियान के खातिर चरवाहा ल पशु मन ल एक जगह रोके अउ ओला गउठान म सकले के जिम्मेदारी दे जाए। सबो गांव म एक संग रोका-छेका करे जाए, जेकर ले फसल मन के नुकसान नइ होही।
मुख्यमंत्री ह ए मउका म किहिन के गउठान के प्रबंधन के खातिर राज्य सरकार वित्तीय संसाधन उपलब्ध करात हावय। मुख्यमंत्री ह कार्यक्रम म गउठान के 24 करोड़ 41 लाख 50 हजार रूपिया के मदद दे के घोषणा करिस। ए रकम म ले मुख्यमंत्री ह प्रदेश के 5820 सक्रिय गउठान के संधारण के खातिर 40 हजार रूपिया प्रति गउठान के मान ले कुल 23 करोड़ 28 लाख रूपिया के मदद दीस अउ प्रदेश के 1135 स्वावलंबी गउठान ल 10 हजार रूपिया प्रति गउठान के मान ले एक करोड़ 13 लाख 50 हजार रूपिया के रकम दे के घोषणा करिन। प्रदेश के स्वावलंबी गउठान वर्मी कम्पोस्ट, सुपर कम्पोस्ट के उत्पादन अउ आन आर्थिक गतिविधी ले होए वाला आय ले स्वयं गोबर खरीदके वर्मी कम्पोस्ट अउ सुपर कम्पोस्ट के उत्पादन स्व सहायता समूह के माध्यम ले करे हावयं। मुख्यमंत्री ह प्रदेश के स्वावलंबी गउठान के समिति अउ गांव वाला ल ए उपलब्धि के खातिर बधाई अउ शुभकामनाएं दीस। मुख्यमंत्री ह महिला स्व सहायता समूह के सदस्य मन ले गोठबात करके उंकर बुता के सराहना करत उत्साहवर्धन करिन।
मुख्यमंत्री श्री बघेल ह गांव वाला ले किहिन के वो गांव के गउठान म नेपियर घास लगावे, जेकर ले पशु मन के खातिर हरा चारा के बेवस्था हो सके। पशु मन के चारा के खातिर मक्का चारा के भी उपयोग करे चाही। मवेशी मनला हरा चारा मिलही, त वो ऐति-वोति नइ जाही। गउठान म मवेशी मनके खातिर चारा, पानी अउ छांव के बेवस्था करके देवा।
कृषि मंत्री श्री रविन्द्र चौबे ह ए मउका म गांव वाला ले वर्चुअल गोठबात करत किहिन के वो राज्य सरकार के योजना मन के अच्छा प्रचार-प्रसार करे, जेकर ले जादा ले जादा किसान योजना मनके लाभ उठा सकें। ओमन अमलीडीह गउठान म गांव वाला ले पूछिस के कतका किसान ए साल धान के फसल के जगह दूसर फसल ले हावयं। गांव के सरपंच ईश्वर पटेल ह बताइन के गांव के बहुत झिन किसान मन ह फसल बदले के फइसला लिस हावय। ओमन ये भी बताइन के महिला स्व सहायता समूह गउठान म वर्मी कम्पोस्ट अउ सुपर कम्पोस्ट के उत्पादन करे के संग सब्जी के उत्पादन, गोबर के लकड़ी बनाये के काम अउ अगरबत्ती निर्माण जइसे कई गतिविधी संचालित करत हावयं, जेकर ले उंकर आमदनी बढ़ात हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।