अंजोर.कोरबा, 10 जून 2021। लाकडाउन के भय देखा के गवई क्षेत्र के दुकानदार ल डरा धमका के अवैध वसूली कइयर 04 आरोपी ल गिरफ्तार करे गे हावय। मिले आरो के मुताबिक आरोपी मन तिर ले अलग-अलग प्रेस मिडिया के 08 नग प्रेस आईडी कारड बरामद करे गे हावय।
कोरबा, उरगा पुलिस के बताती राकेश कुमार श्रीवास पिता लक्ष्मी नारायण श्रीवास साकिन संजय नगर फरसवानी थाना उरगा जिला कोरबा के रिपोर्ट दर्ज कराइन के येकर संजय नगर म सेलून के दूकान हावय। जेला साफ-सफाई करे के दू मोटर साइकल म सवार होके 04 लोगन आइस अउ अपन मोबाईल ले येकर दुकान के फोटो खिचे लगे। प्रार्थी डहर ले पुछे म चारो मनखे बोले के आज लाक डाउन हावय तै दुकान खोलेस हम पेपर म छाप करके तोला जेल भेजवा देबो अउ बताइन के हमन प्रेस वाले आन बचना हावय त 5000 रूपिया दो। तब प्रार्थी डर के मारे उंकर ले माफी मांगे लगे तब भी वोमन डरात धमकात रिहिन अउ प्रार्थी ले 1000 रूपिया ले लिस। अइसने गांव के निरंजन राठौर ले 4000 रूपिया अउ ईश्वरी राठौर ले 550 रूपिया अउ गांव के आन लोगन ले भी डरा धमका के रकम उगाही करे हावय।
जेमा तुरते पुलिस टीम डहर ले मउका म पहुंच करके सूचना के तस्दीक करे गिस। सूचना सही पाये जाये ले आरोपी डहर ले अपराध धारा 384, 34 भादवि के घटित पाये जाये ले आरोपीगण 01. सुखसागर माथूर पिता कुसुम लाल उमर 40 साल साकिन कुरदा थाना चांपा 02. राजेन्द्र प्रसाद जायसवाल पिता गणेश राम उमर 36 साल सावकिन बरपाली चौक चांपा थाना चांपा 03. पवन कुमार नामदेव पिता स्व. सुखलाल प्रसाद उमर 34 साल साकिन बरपाली चौक चांपा थाना चांपा 04. कीर्तन पटेल पिता रमेश कुमार उमर 29 साल साकिन कुरदा थाना चापा जिला जांजगीर 02 नग मोटर सायकल जप्त करत गिरफतार करके न्यायिक रिमाण्ड म माननीय न्यायालय भेजे गिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।