रेलवाही म जीव दे दिस छै परानी, पारिवारिक कलह के कारन बनिस 'दारू'

अंजोर.महासमुंद, 10 जून 2021। रेलवाही म अपन बेटी मनके संग जाके जीव दे के पाछु परिवार म झगरा होना बताये जात हावय। बताती बात के उमा साहू के पति केजऊ राम ह दारू पिये अउ इही बात म रातकुन घर म झगरा होइस। रीस म महतारी ह अपन सबो बेटी ल धरके घर ले निकलगे, आस परोस के मन नंगत खोजिस फेर नइ पइस। दूसर कोति ले पहाती आरो मिलिस के ईमलीभांठा नहर पुलिया के पास रेलवे पटरी म छै परानी रेताय परे हावय। सुनके लोगन मन के जीव मुंह म आगे, जवान अउ लइकुसहा नोनी मन संग संज्ञान महतारी ह आखिर काबर मरे के उदीम करिस। मिले आरो के मुताबिक मरइया मन म उमा साहू, अन्नपूर्णा, यशोदा, भूमिका, कुमकुम अउ तुलसी हावय।

महासमुंद जिला के ईमलीभांठा नहर पुलिया के पास रेलवे पटरी ले कटके महिला अउ उंकर पांच लइका मनके मउत म गहरा दुख प्रकट करत जिला प्रशासन अउ पुलिस प्रशासन के ए पूरा घटना के जांच करके जरूरी कार्रवाई सुनिश्चित करे के निर्देश दे हावय। जिला कलेक्टर ह घटना के संबंध म बताइन हावय के प्रारंभिक जांच म ये पाये गे हावय के मृतक परिवार के स्वयं के मकान गांव बेमचा, जिला महासमुंद म हावय। परिवार के मुखिया केजउ राम साहू गांव मुढ़ेना म राईस मिल म हमाली के काम करथे। केजउ राम साहू के नाम म पौने दू एकड़ जमीन हावय। बीपीएल परिवार आए 26 क्विंटल धान इंकर डहर ले बेचा गे हावय। बीते रात पारिवारिक कलह होए के जानकारी प्रारंभिक रूप ले मिले हावय। ए संबंध म पुलिस डहर ले आगू जांच करे जात हावय।

का ओकर आदमी के दारू पिये के आदत ही उंकर परिवार ल मडि़यामेट कर दिस या आन कोनो बात रिहिस ये तो बने फरीफरकत होए के बादे केहे जाही। लेकिन लोगन मन के बताती ओकर पति ह दारू के आदि रिहिस, उहू रात पिये रिहिस तव फेर येकर जिम्मेदार दारू अउ दारू के बैपार करने वाले ल भी माने जाना चाही।

हादसा कतका दर्दनाक रिहिस होही येकर अंदाजा यमराज तको नइ लगा सके। पटरी म अंधाधुन दउड़त रेल म जाके महतारी-बेटी मन झपाये हावय। उंकर मनके लाश के ठिकाना नइये, लहू-लहू म लतफदाये कोनो ए बाजू त कोनो ओ बाजू ढलगे हावय। कटे फटे देह म बने-बने कपड़ा ओनहा अउ पटरी म परे साबूत चप्पल बहुत कुछ कहानी काहत हावय, दुखियारी के दुख अउ उंकर उपर बीते बात के।