अंजोर.रायगढ़, 12 जून 2021। पुलिस चौकी जूटमिल के छातामुड़ा बाईपास म खड़ ट्रेलर, ट्रक ले ड्राइवर मनके मोबाइल चोरी के शिकायत के बाद चौकी प्रभारी निरीक्षक अमित शुक्ला डहर ले थाना के आरक्षक अउ अपन मुखबिर ल क्षेत्र म संदिग्ध म नजर रखे के पतासाजी के निर्देश दीस।
तभे बखत बाईपास के पास मुखबिर ले एमन ल सूचना मिलिस के दू लड़क रात के संदिग्ध हालत म देखे गे हावयं, जेला मोबाइल चोर होए के संबंध म पेट्रोलिंग स्टाफ पूछताछ करिस। दुनों बालक के उमर 16 अउ 17 साल के हावयं। एक किशोर पढ़ाई करत हावय अउ दूसरा छोड़ चुके हावय। वो बताइन के पाछु एक महीना ले वो सरलग बाईपास म सुनसान जगह म खड़े गाड़ी म कीमती सामान तलाशत अउ मोबाइल मिले म चोरी करके रख लेवत रिहिस।
अपचारी बालक ले पूछताछ करे म ओमन बजरंग पारा के एक बाड़ी ले टुल्लू पंप अउ ट्रांसपोर्ट नगर के पास एक बोलेरो वाहन ले बैटरी चोरी कबूल करे हावयं। दुनों अपचारी बालक के निशादेही म 17 नग आने-आने कंपनी के मोबाइल एक बैटरी अउ एक पुल्लू पंप उंकर घर ले बरामद करिन गे हावय। आरोपी मन ले कुल जब्ती चोरी के सम्पत्ति के कीमत करीब 1,78,000 हावय। अपचारी बालक ले जप्त होए चोरी के संपत्ति के स्वामी के पता लगाये जात हावय। मामला म दुनों अपचारी बालक के विरुद्ध चौकी जूटमिल म धारा 41(1+4)CrPC/ 379 IPC के कार्यवाही करके दुनों विधि उल्लंघनकारी बालक ल किशोर बाल न्यायालय म पेश करे गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।