Kabirdham District : कोचई कांदा ले समहू के दीदी मन कमाइस 1 लाख 40 हजार

अंजोर.कवर्धा, 12 जून 2021। ग्राम पंचायत घुघरी खुर्द विकासखंड कवर्धा म संचालित जय महामाया स्व मदद समूह के सदस्य मन कोचई बेचके गजब आमदनी कमावत हावय। ए समूह म 10 सदस्य हावयं जेन सबो परंपरागत कृषि व्यवसाय ले जुड़ी हावय जेमा एक सदस्य परनिया राजपूत ह मात्र 28 हजार रूपिया के लागत लगाके कोचई के उत्पादन अपन डेढ़ एकड़ के भूमि म करिन हावय। फसल तइयार होए के बाद इंकर इहां अब तक 84 कोंटल कोचई के उत्पादन हो चुके हावय, जेला बेचके लगभग एक लाख 40 हजार रूपिया ले जादा के आमदनी हो गे हावय। 

मिले आरो के मुताबिक फसल उत्पादन के खातिर एमन ल राष्ट्रीय ग्रामीण आजीविका मिशन बिहान योजना के मदद मिलिस, जेमा समूह ल जारी करे गे रकम म ले इंकर डहर ले वित्तीय मदद ले गिस अउ अपन परंपरागत बुता के करिन। घर ले कुछ पइसा लगात इंकर डहर ले समहू ले वित्त मदद पाके खातु बीजहा आदि के बेवस्था करे गिस। जानबा होवय के इंकर डहर ले कोचई उत्पादन म जैविक खातु के प्रयोग करिन, जोकि बहुत ही कम दर म मिले के संग फसल के खातिर लाभकारी सिद्ध होइस हावय। इही सेती कम लागत म अच्छा पैदावार हासिल होइस जेला आसपास के बाजार म बेचत एमन ल बड़े रकम मिलिस, जेन सोज इंकर परिवार के होए लाभ ल दर्शात हावय।

ए संबंध म गोठबात करत मुख्य कार्यपालन अधिकारी जिला पंचायत कबीरधाम विजय दयाराम के. बताते हावयं के महिला समूह के सबो सदस्य कुछ न कुछ बुता ले जुड़े हावयं अउ पहिली ले ही कोचई उत्पादन के बुता इंकर घरेलू बुता रिहिन हावय। समूह म जुड़े के बाद आर्थिक तंगी ले एमन ल दो-चार होए के स्थिति अब नइ आई। फसल लगाये के खातिर वित्तीय मदद समहू के अंदर ही मिल गे अउ संग म जैविक खातु सस्त दर म उपलब्ध हो गे। समहू के सदस्य के अभी तक 1 लाख 40 हजार रूपिया के आमदनी हो चुके हावय अउ फसल अभी भी लगे हावय जेला बेचके अऊ आमदनी उंकर डहर ले अर्जित करे जाही। सीईओ ह आगू बताइन के संवहनीय कृषि प्रोजेक्ट के तहत 60 गांव चयनित करे गे हावयं, जेमा किसान पाठशाला म जैविक खातु अउ कृषि सुधार उन्नत कृषि के शाला ज्ञानवर्धन के खातिर चलाय जात हावय जेमा गांव के आन किसान भी ए योजना ले जुड़ करके लाभ ले सकत हावयं।