मुख्यमंत्री ह ए मउका म अपन उद्बोधन म किहिन के कोरोना के दूसरइया लहर के बखत पूरा छत्तीसगढ़ के संग राजनांदगांव जिला के लोगन ह भी बहुत कठिनाई के सामना करे हावय, सबो के सहयोग ले ए संक्रमण ल नियंत्रित करे म काफी हद तक सफलता मिले हावय। बहुत संतोष के बात हावय के छत्तीसगढ़ म संक्रमण दर अब सिर्फ 8 प्रतिशत रहिगे हावय। राजनांदगांव जिला म त ये केवल 3 प्रतिशत के आसपास आ गे हावय। पूरा प्रदेश म नवा मरीज मन के संख्या घटे हावय अउ रिकव्हरी रेट म सरलग सुधार होए हावय। ये बड़का खुशी के बात हावय के राजनांदगांव जिला म रिकव्हरी रेट 94 प्रतिशत के आसपास पहुंच चुके हावय। हम लोगन ह बहुत कुछ गंवाने के बाद ये मुकाम हासिल करे हावन। कोरोना के सेती बहुत लोगन हम ल हमेशा के खातिर बिछड़ गे। कोरोना वायरस कतका खतरनाक हो सकत हावय ए बात के अहसास ए दूसरइया लहर ह हमन ल बने रकम ले ले करा दे हावय।
कोरोना संक्रमण के दूसरइया लहर ले निपटे खातिर छत्तीसगढ़ म करे गे प्रयास के बारे म बतात मुख्यमंत्री श्री बघेल ह किहिन के कोरोना के दूसरइया लहर ल छत्तीसगढ़ इही सेती जल्दी काबू म करे पाहे काबर के हम लोगन ह येकर शुरूआत होवत ही चाक-चौबंद व्यवस्था कर देन। दूसर राज्य कस हमर इहां न तो, ऑक्सीजन के लेके आपाधापी होइस अउ न ही जरूरी दवई मन के किल्लत होइस। हमन लउहा के संग अस्पताल मन अउ कोविड सेंटर म बिस्तर के इंतजाम करे अउ बिस्तर के उपलब्धता के जानकारी ऑनलाइन कर देन।
मुख्यमंत्री श्री बघेल ह कोरोना के दूसरी लहर के बखत सबो सामाजिक अउ आन संगठन डहर ले हर स्तर म दिये गे सहयोग के सराहना करिन। ओमन किहिन के छत्तीसगढ़ म ए लड़ाई के लड़े म सबो वर्ग के लोगन अउ सामाजिक संगठन ह सक्रिय योगदान दे हावय। अप्रैल महीने म जिहां एक तनि राजनांदगांव जिला म रिकवरी रेट 74 प्रतिशत तक रिहिस, वो ह आज बढ़ करके 94 प्रतिशत हो गे हावय। इही रकम ले छत्तीसगढ़ प्रदेश म रिकवरी रेट अब 89 ले 90 प्रतिशत हो गे हावय। ये सबो के सामूहिक प्रयास ले ही सम्भव हो पाये हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।