महात्मा गांधी नेत्र चिकित्सालय ल बनाये जाही कोविड आइसोलेशन वार्ड, कलेक्टर दिस लघियात बुता उरकाये के निर्देश

अंजोर.रायगढ़, 21 मई 2021। रायगढ़ के अशर्फी देवी चिकित्सालय के बाजू म महात्मा गांधी नेत्र चिकित्सालय ल कोविड आइसोलेशन वार्ड बनाये जाही। कलेक्टर भीम सिंह के निर्देश म प्रशासन ह येला अधिग्रहण करे ले हावय। आज बिहनिया कलेक्टर श्री सिंह ह अस्पताल के निरीक्षण करिन। ए बखत स्वास्थ्य अउ पीडब्ल्यूडी के वरिष्ठ अधिकारी भी मौजूद रिहिन। कलेक्टर श्री सिंह ह पूरा अस्पताल परिसर के मुआयना करिन। ए बखत ओमन अस्पताल ल रेनोवेटेड हिस्सा के हाल म कोविड मरीज मन के खातिर शुरुआत म 20 बेड के आइसोलेशन वार्ड बनाये के निर्देश दिस। एमे कोविड गाइडलाइन्स के मुताबिक बेडिंग अउ पार्टीशन तइयार करे खातिर किहिन। ओमन पेशेंट एरिया के आइसोलेट करे अउ उंकर खातिर अलग वाशरूम तइयार करे के खातिर भी किहिन। येकर संग ही डॉक्टर्स चैम्बर अउ आन सारी व्यवस्था करत जल्दीू आइसोलेशन वार्ड के संचालन प्रारम्भ करे के निर्देश दिस।

कलेक्टर श्री सिंह ह चिकित्सालय के दूसरा हिस्सा के भी निरीक्षण करिन। जेन जर्जर स्थिति म हावय अउ येकर रेनोवेशन करे जाना हावय। इहां ओमन पूरा भवन के अवलोकन करके तुरते जरूरी मरम्मत के खातिर प्रस्ताव बनाये के निर्देश दिस। जेकर ले आने वाला समय म ए हिस्सा म भी आइसोलेशन वार्ड शुरू करे जा सके। ओमन किहिन के शुरुआत म एला कोविड आइसोलेशन वार्ड के रूप म उपयोग करे जाही। आने वाला समय म जरूरत के मुताबिक एला कोविड केयर सेंटर के रूप म परिवर्तित करे जा सकत हावय। निरीक्षण के बखत ओमन अस्पताल के निर्माण अउ संचालन के संबंध म विस्तार ले जानकारी भी ली। कलेक्टर श्री सिंह ह निरीक्षण के बखत अशर्फी देवी चिकित्सालय के रेनोवेशन बुता के भी जायजा लिस। ओमन ये बुता भी पूरा तेजी ले करे के निर्देश दिस। ए बखत एसडीएम रायगढ़ युगल किशोर उर्वशा, सीएमएचओ डॉ.एस.एन. केसरी, ईई पीडब्लूडी आर.के.खाम्बरा, डॉ.रूपेन्द्र पटेल सहित पीडब्लूडी के अधिकारी उपस्थित रिहिन।