प्रधानमंत्री के वर्चुअल बइठक म सीएम बघेल होइस शामिल, पीएम ह जांजगीर-चांपा जिला कलेक्टर ले करिन गोठबात

अंजोर.रायपुर, 20 मई 2021। प्रधानमंत्री श्री नरेंद्र मोदी डहर ले आज देश के 11 राज्य के 60 जिला म कोविड-19 प्रबंधन अउ कोरोना संक्रमण के अभी के बेरा म स्थिति के समीक्षा के खातिर आयोजित वर्चुअल बइठक म छत्तीसगढ़ के मुख्यमंत्री श्री भूपेश बघेल भी शामिल होइन। ए बइठक म छत्तीसगढ़ के बलौदाबाजार-भाटापारा, रायगढ़, जांजगीर-चांपा, कोरबा अउ बिलासपुर जिला के कलेक्टर जुड़े रिहिस। प्रधानमंत्री श्री मोदी ह जांजगीर-चांपा के कलेक्टर यशवंत कुमार ले गोठबात करके जिला म कोविड प्रबंधन के स्थिति के जानकारी लीस। बइठक म मुख्य सचिव अमिताभ जैन, मुख्यमंत्री के अपर मुख्य सचिव सुब्रत साहू, स्वास्थ्य विभाग के प्रमुख सचिव डॉ. आलोक शुक्ला अउ मुख्यमंत्री के सचिव सिद्धार्थ कोमल परदेशी भी उपस्थित रिहिस।

जांजगीर-चांपा जिला के कलेक्टर ह गोठबात के बखत बताइन के मुख्यमंत्री भूपेश बघेल के निर्देश के मुताबिक जिला म जादा संक्रमण वाला क्षेत्र ल चिन्हित करके उहां जनजागरूकता अभियान चलाया गिस अउ सघन टीकाकरण करे गिस। ओमन बताइन के जांजगीर-चांपा जिला के 31 गांव म 90 प्रतिशत लोगन के वैक्सीनेशन हो चुके हावय। ओमन बताइन के जिला म शतप्रतिशत हेल्थ वर्कर्स अउ फ्रंट लाइन वर्कर्स ल वैक्सीन के पहिली डोज लगाये जा चुके हावय। ये दुनों वर्ग म 85 प्रतिशत लोगन ल दूसरइया डोज भी लगाये जा चुके हावय। जल्दीन ही ये वर्ग के सबो लोगन के वैक्सीनेशन कर ले जाही। जिला म 45 साल ले जादा उमर के 70 प्रतिशत लोगन के वैक्सीनेशन करे गे हावय। 18 ले 44 साल उमर के लोगन के वैक्सीनेशन सुरू हो गे हावय। जइसे-जइसे वैक्सीन के आपूर्ति बाढ़ही, तेजी ले वैक्सीनेशन करे जाही। जिला म पॉजिटिविटी रेट 30 प्रतिशत रिहिस, जेन अब घटकर 14 प्रतिशत हो गे हावय। बहुत जल्दीी ये 10 प्रतिशत के नीचे आ जाही। 

कलेक्टर ह ये भी जानकारी दीस के कई गांव म लोगन ह स्वयं ही बाहिर ले आने वाला लोगन के आवाजाही म प्रतिबंध लगाये हावय, जेकर ले संक्रमण नी फैले। जिला म आयुष काढ़ा के 10 हजार पैकेट हाट बाजारो म वितरित करे गे हावयं। अस्पताल मन म पोस्ट कोविड ओपीडी भी सुरू करे गे हावय।