अंजोर.गरियाबंद, 18 मई 2021। जिला कलेक्टर निलेश कुमार क्षीरसागर ह आज अधिकारी मन के समय-सीमा प्रकरण के समीक्षा बइठक म जिला म कोरोना रोकथाम के खातिर जरूरी उपाय के संबंध म अधिकारी मन ले गोठबात करिन अउ जरूरी दिशा-निर्देश दिस। जिला के सबो शासकीय कार्यालय म कार्यरत कर्मचारी मन के वैक्सीनेशन करे जाही। 31 मई तक शासकीय कार्यालय म आम जनता के प्रवेश प्रतिबंधित हावय। जिला के सबो एस.डी.एम, सबो जनपद सी.ई.ओ अउ विकासखंड स्तरीय अधिकारी वीडियो कॉन्फ्रेंसिंग के माध्यम ले ऑनलाइन बइठक म जुडे़ रिहिस। कलेक्टर ह जिला म जादा ले जादा लोगन ल कोरोना वैक्सीन लगाये म जोर देत किहिन के टीकाकरण केन्द्र म पहुंचे सबो लोगन ल कोरोना वैक्सीन लगाये जाये, चाहे अउ अंत्योदय, बी.पी.एल, ए.पी.एल कोनो भी वर्ग के हो।
ओमन सबो विभाग के कार्यालय प्रमुख अधिकारी मन ल भी अधिनस्थ अधिकारी-कर्मचारी ल वैक्सीन लगवाये के निर्देश दिस। ए बर कर्मचारी मन के ऑनलाईन पंजीयन कराई जाये। कर्मचारी मन ल वैक्सीन लगवाये के पूरा जिम्मेदारी विभाग प्रमुख अधिकारी के होही। ए संबंध म सबो कार्यालय प्रमुख अधिकारी अधिनस्थ कर्मचारी मन ल वैक्सीन लग चुके होए संबंधी प्रमाण पत्र 01 जून ले पहिली कलेक्टर ल प्रस्तुत करही।
कलेक्टर ह सबो एस.डी.एम के ए सप्ताह भी लॉकडाउन के बखत कड़ाई बरकरार रखे के निर्देश दिस। ओमन जिला म लइका म संक्रमण फैले के सम्भावना ल गंभीरता ले लेवत अधिकारी मन ल लइका के भी एंटीजन टेस्ट कराये खातिर निर्देशित करिन। कलेक्टर ह सबो एस.डी.एम के टेस्टिंग बढ़ात प्रति दिन 2 हजार टेस्टिंग के लक्ष्य करार करे ल किहिन। जिला म टेस्टिंग जादा होए ले संक्रमण के प्रतिशत कम होही। कलेक्टर ह अवगत कराइन के 18 प्लस ले 44 वर्ग उमर समुह के खातिर पंजीयन के आधार म शासन स्तर ले वैक्सीन उपलब्ध कराये जाही। जिला ल मिले वैक्सीन विकासखंड ल भी उहां होए पंजीयन के आधार म ही दे जाही।
ओमन किहिन के ए उमर वर्ग के पंजीयन मोबाईल नम्बर के बिना भी करे जा सकत हावय। टीकाकरण केन्द्र म जेन भी वर्ग के लोगन वैक्सीन लगाये बर आही, ओला वैक्सीन लगाई जाये। कलेक्टर ह किहिन के 45 प्लस उमर वर्ग के छुटे लोगन ल भी कोरोना टीका लगवाये सबो एस.डी.एम विशेष रूप ले धियान देव। शासकीय कार्यालय म आम जनता के आवाजाही के संबंध म कलेक्टर ह अवगत कराइन के लॉकडाउन के बखत 31 मई तक सबो शासकीय कार्यालय म आम जनता के प्रवेश प्रतिबंधित हावय। कार्यालयीन कार्य के परपस म 50 प्रतिशत उपस्थिति के संग कर्मचारी मन के रोटेशन आधार म कार्यालय खुलही। ओमन किहिन के कोनो भी कार्यालय म कर्मचारी धनात्मक पाये जाये म आन लोगन संक्रमित न हो ए बर स्टाफ के सबो कर्मचारी मन के एंटीजन टेस्ट कराई जाये। ये जिम्मेदारी संबंधित कार्यालय प्रमुख के होही। बैठक म ए.डी.एम श्री जे.आर. चौरसिया, डिप्टी कलेक्टर श्रीमती ऋषा ठाकुर सहित सबो विभाग के जिला प्रमुख अधिकारी उपस्थित रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।