अंजोर.दुर्ग, 19 मई 2021। मुख्यमंत्री भूपेश बघेल के निर्देश म जलसंसाधन विभाग के अइसे संरचना के जीर्णोद्धार होइस हावय जेमा बरसों ले एक भी बूँद सिंचाई के खातिर किसान मन ल नसीब नइ होइस। भाठागाँव लिफ्ट इरिगेशन स्कीम साल 1989 म शुरू होए रिहिस अउ 1992 म नहर म टूट फूट होए के सेती बंद हो गे रिहिस। येकर चलत छह गाँव ल खरीफ फसल के बखत मिले वाला सिंचाई के सुविधा बाधित होत रिहिस। मुख्यमंत्री श्री बघेल ह ए बजट म ए योजना के जीर्णोद्धार के स्वीकृति दीस अउ येकर खातिर पाँच करोड़ 51 लाख रूपिया के प्रशासकीय स्वीकृति दीस। जलसंसाधन विभाग ह सिविल वर्क पूरा ले लिस हावय। भूमिसमतलीकरण के बुता अभी चल हावय अउ इलेक्ट्रिकल वर्क ले संबंधित बुता जारी हावय।
कलेक्टर डॉ. सर्वेश्वर नरेंद्र भुरे ह आज योजना के प्रगति के निरीक्षण करिन। अधिकारी मन ह बताइन के जून म ये बुता पूरा कर ले जाही। कलेक्टर ह किहिन के योजना ले संबंधित इलेक्ट्रिकल मशीनरी वाला बुता ल जून के पहिली सप्ताह तक पूरा करके लें। योजना ले खरीफ फसल म किसान मन ल मदद मिले, रबी म भी किसान मन ल मदद मिल पाए। जलसंसाधन विभाग के कार्यपालन अभियंता सुरेश पांडे ह बताइन के योजना ले 1538 हेक्टेयर खेत म सिंचाई हो सकही। येकर ले पाटन ब्लाक के तीन गाँव लाभान्वित होही। एमे जामगांव आर, बोरवाय अउ औरी म 818 हेक्टेयर खेत के सिंचाई हो सकही। येकर संग ही गुंडरदेही ब्लाक के भाठागांव, रनचिरई, जरवाय म 720 हेक्टेयर म सिंचाई हो सकही। रबी फसल म भी एक बार के पानी किसान मन ल दे सकही जेकर ले चना उक के फसल ले म किसान मन ल आसानी होही। ए बखत सहायक कलेक्टर हेमन्त नंदनवार अउ एसडीएम विपुल गुप्ता तको उपस्थित रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।