‘नक्सली अउ पुलिस के गोली नइ चाही’ मुहिम म आज छत्तीसगढि़या क्रांति सेना के प्रदेशभर म धरना

अंजोर.रायपुर, 28 मई 2021। बस्तर अंचल म होवत छत्तीसगढि़या भाई-बहिनी मन ऊपर अत्याचार अउ सिलगेर म होए गोलीकांड के विरोध म आवाज बुलंद करत आज प्रदेशभर म छत्तीसगढि़या मनके हक बर लड़ईया, गैर राजनीतिक संगठन छत्तीसगढि़या क्रां‍ति सेना ह तको गोहार करत अपन घर के दुवारी म शांतिपूर्वक धरना करिन। 

जानबा होवय के पुलिस प्रशासन ह बस्तर म एक अऊ पुलिस केंप, सिलगेर गांव म बनाये के तइयारी म हावय। ये बात के विरोध उहां के स्थानीय लोगन मन करत हावय। पुलिस प्रशासन येमा मुंह बांधे बइठे हावय, जवान अउ ग्रामीण मनके बीच होए झड़प म तीन बेगुनाह के जान गए। इही बात ल प्रशासन के कान तक पहुंचाये के खातिर छक्रासे के सेनानी मन घर के दुवारी म शांतिपूर्वक तकती लेके धरना म बइठे हावय। 

छत्तीसगढि़या क्रांति सेना के प्रदेश अध्यक्ष ह अमित बघेल जी ह सोशल मीडिया के माध्यम ले जानकारी साझा करत लिखे हावय के ‘नक्सली अउ पुलिस के गोली नइ चाही, हमला स्कूल-अस्पताल अउ रोजगार चाही’। प्रदेशभर के सेनानी मन अपन-अपन डिही म गोहार करिन के छत्तीसगढ़ बचाव, छत्तीसगढ़िया बचाव, मूलनिवासी बचाव, ये परदेशिया वादी सरकार ले, बस्तर म नक्सली ले, बस्तर म परदेशिया पुलिस वाले ले, भाजपा अऊ कांग्रेस ले।

बस्तर गांव ले गुंगवावत आगी अब राजधानी ले देश अउ विदेश तक पहुंचत हावय। सोशल मीडिया के माध्यम ले रोज अनेक पोस्ट बस्तरिहा मनके समर्थन म होवत हावय। समय रहत कहू सरकार बने चेत करके आदिवासी मनके हक के बात नइ करही तव आगी अऊ बड़ा रूप ले सकत हावय। वइसे प्रशासन अउ आन राजनीतिक दल मन तको जांच कमेटी बनाके सिलगेर घटना के आरो लेवत हावय, अब देखव का आथे उंकर रिपोर्ट म।