अंजोर.बलौदाबाजार, 28 मई 2021। पौंसरी हत्याकांड के 12 घंटा के भितर खुलासा करत पुलिस ह दू आरोपी ल धर दबोचे हावय। मानवता ल कलंकित करइया घटना ले संज्ञान लेवत पुलिस के बड़का अधिकारी मन लघियात पतासाजी करत आरोपी तक पहुंचगे। सिटी कोतवाली पुलिस के बताती दू आरोपी म एक नाबालिक हावय, आरोपी के नाम मुकेश उर्फ जगमोहन वर्मा पिता ओमप्रकाश वर्मा उमर 25 साल अउ अपचारी बालक साकिनान पौंसरी बताये गे हावय। अपचारी बालक अउ आरोपी मुकेश उर्फ जगमोहन वर्मा के खिलाफ 302, 376(क)(ख), 201, 34 भादवि, 6, 10 पाक्सो एक्ट कायम करे गे हावय। जेमा आरोपी मुकेश ल जेल दाखिल भेजे गे हावय अउ अपचारी बालक ल बाल संप्रेक्षण गृह माना भेजे गे हावय।
जानबा होवय के गांव पौंसरी म लक्ष्मीनारायण के घर बाड़ी के कुंआ म लइका के लाश मिले रिहिस। लइका के लाश ल निकालके पहचान कराइन त वो ह पौसरी के ही एक 07 साल के नाबालिग बालिका के रिहिस। मृतिका के परिजन ले पूछताछ करे म बताइन के लइका पहिली दिन ल गायब रिहिस अउ ओमन गजब खोजत रिहिस। दूसरइया दिन खोजबीन करे म मंझनिया गांव के लक्ष्मी नारायण वर्मा के बाड़ी म कुंआ के अन्दर पानी म ओकर लाश मिलिस।
मामला के गंभीरता अउ संवेदनशीलता ल देखत आई.के.एलेसेला पुलिस अधीक्षक के दिशा निर्देशन म निवेदिता पाल अतिरिक्त पुलिस अधीक्षक अउ सुभाष दास एसडीओपी बलोदा बाजार के मार्गदर्शन म थाना सिटी कोतवाली के कुल 05 टीम आरोपी के तलाश करे म जुटगे। प्रकरण म घटनास्थल के निरीक्षण अउ गांव वाले ले पूछताछ म घटना म एक संदेही अपचारी बालक के होना पता चलिस। संग ही डॉग स्कॉट अउ रायपुर फॉरेंसिक टीम के भी मदद लिस। संदेही अपचारी बालक ले पूछताछ करे म वो ह गोलमोल जवाब देवे। फेर सरलग पूछताछ करे म बताइन के मृतिका अपचारी बालक के घर आयी रिहिस जेला बाथरूम अंदर ले जाके उंकर संग जबरदस्ती दुष्कर्म करिन अउ हत्या करिन। उंकर बाद अपचारी बालक अपन घर ले रस्सी लान के मृतिका के हाथ अउ पैर के बांध दिस। अपचारी बालक ह मुकेश उर्फ जगमोहन वर्मा ल फोन करके के बुलाइस अउ फेर दोनो ह मिलके पीड़िता के शव ल लक्ष्मीनारायण वर्मा के बाड़ी स्थित कुंआ म फेंक दीस।
ये मामला के खुलासा करत पुलिस अधीक्षक ह सबो पालक ले अपील करिन के अपन लइका के समुचित देखभाल करें अउ उंकर बाहिर जाये, खेले आदि म सतत निगाह रखत लइका के सुरक्षा के प्रति सदैव सावधानी बरतें।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।