अंजोर.रायपुर, गरियाबंद 26 अप्रैल 2021। गरियाबंद जिला के मैनपुर विकासखंड के गांव कुल्हाड़ीघाट के रहइया 92 बछर के सियनहिन बल्दी बाई के काली रात एंटीजन टेस्ट म कोविड पॉजिटिव रिपोर्ट आये रिहिस। येकर पहिली ओला सामान्य सर्दी बुखार के लक्षण दिखाई दे रिहिस। कुल्हाड़ीघाट के स्वास्थ्य कार्यकर्ता डहर ले येकर तुरते जानकारी दे गे अउ काली राते के ही ओला सामुदायिक स्वास्थ्य केंद्र मैनपुर म भरती करे गिस।
उहां एंटीजन टेस्ट अउ प्रारंभिक उपचार के बाद ओला रात म ही कोविड अस्पताल गरियाबंद रिफर करे गिस। कलेक्टर निलेश क्षीरसागर के निर्देश म सीएमएचओ डॉ. नवरत्न ह कोविड-19 के बढि़या उपचार के खातिर ओला रायपुर मेकाहारा रिफर कर दिस। अभी उंकर रायपुर म ही उपचार चलत हावय। मुख्यमंत्री भूपेश बघेल के संज्ञान म आते ही ओमन वरिष्ठ डॉक्टर मनला तुरते निर्देशित करिस के बल्दी बाई के बढि़या ल बढि़या चिकित्सा मुहैया कराई जाए। ओमन बल्दी बाई के स्वास्थ्य म डॉक्टर मन के कड़ा नजर रखे के निर्देश दे हावयं। मुख्यमंत्री ह बल्दी बाई के जल्दी स्वस्थ होए के कामना करे हावय। फिलहाल उंकर स्वास्थ्य स्थिर हावय। जानबा होवय के गांव कुल्हाड़ीघाट म ही बल्दी बाई के घर पहिली पइत प्रधानमंत्री श्री राजीव गांधी आए रिहिस अउ उंकर हाथ ले कांदा-कूसा तको खाये रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।