अंजोर.रायपुर, 26 अप्रैल 2021। लोक स्वास्थ्य यांत्रिकी अउ ग्रामोद्योग मंत्री गुरु रूद्रकुमार अपन प्रभार के जिला सहित अहिवारा दुर्ग म कोरोना रोकथाम के उपाय के सरलग समीक्षा करत हावय। मंत्री गुरु रूद्रकुमार वर्चुअल बैठक लेके कोरोना संक्रमण के स्थिति, जरूरतमंद के राहत अउ स्वास्थ्य संबंधी सेवा के समीक्षा करिन हावयं। मंत्री गुरु रुद्रकुमार ह किहिन के मुख्यमंत्री भूपेश बघेल के नेतृत्व म कोरोना संक्रमण काल के ए विषम परिस्थिति म राज्य म स्वास्थ्य सेवा के विस्तार हमर सर्वोच्च प्राथमिकता हावय।
संकट के ए घड़ी म सामाजिक संगठन, सामाजिक संस्था, स्वयंसेवी संस्था, उद्योगपति अउ जनप्रतिनिधी मन ल मदद के खातिर आगू आना एक अनुकरणीय पहल हावय। सबके सहभागिता ले ही कोरोना ल हराये म सफलता मिलही। इही कड़ी म मंत्री गुरु रूद्रकुमार सरलग वर्चुअल बइठक के माध्यम ले समाज प्रमुखों सहित सामाजिक संगठन, सामाजिक संस्थाएं, स्वयंसेवी संस्थाएं, उद्योगपति अउ जनप्रतिनिधी मन ले रूबरू हो रिहिन हावयं।
जानबा होवय के मंत्री गुरु रुद्रकुमार अपन प्रभार वाले जिला कांकेर कोंडागांव अउ नारायणपुर के जनप्रतिनिधी मन, सामाजिक संगठन,स्वयंसेवी संस्था, समाज प्रमुख सहित कलेक्टर मन ले 10 अप्रैल के वर्चुअल बइठक करके स्वास्थ्य सेवा के समीक्षा करके उंकर विस्तार के खातिर जरूरी निर्देश दिस। ओमन अपन विधानसभा क्षेत्र अहिवारा के स्थानीय जनप्रतिनिधी मन ले कोरोना संक्रमण के रोकथाम अउ करे जात प्रयास ल लेके वर्चुअल चर्चा करिन। ओमन स्वास्थ्य सेवा ल बढ़ाये खातिर अपन विधायक निधि ले 30 लाख रुपिया दे के घोषणा भी करिन। इही कड़ी म 16 अप्रैल के अहिवारा के स्वास्थ्य संबंधी सेवा के समीक्षा करके अस्पताल मन म बेड्स, वेंटिलेटर के संख्या अउ ऑक्सीजन सप्लाई संबंधी जानकारी लीस। ए वर्चुअल बइठक म दुर्ग जिला के राजस्व, पुलिस, पंचायत, खाद्य, स्वास्थ्य विभाग सहित नगरीय निकाय विभाग के अधिकारीगण उपस्थित रिहिस। मंत्री गुरु रूद्रकुमार ह अवइया योजना म विस्तृत चर्चा करिन अउ कोरोना संक्रमण के बढ़त प्रसार ल रोके अधिकारी मन ल जरूरी निर्देश दिस। जानबा होवय के मंत्री गुरु रुद्रकुमार ह अहिवारा के लोगन के मदद के खातिर रायपुर स्थित अपन शासकीय निवास कार्यालय म स्थापित एक हेल्पलाइन नंबर 0771-2420707 जारी करे हावय। जेमा क्षेत्र के लोगन मन कार्यालयीन समय म अपन समस्या ले अवगत कराही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।