अंजोर.रायपुर। छत्तीसगढ़ शासन डहर ले लोगन के सुविधा के खातिर प्रदेश म नवा राजस्व इकाई बनाये जात हावय। लोगन के जमीन जायदाद के संग ही आन राजस्व संबंधी कार्य उंकर निवास के पास ही उपलब्ध कराये खातिर राजस्व अनुभाग, तहसील, उप तहसील अउ राजस्व निरीक्षक मंडल शुरू करे जात हावय। इही कड़ी म रायगढ़ जिला के कोसीर म उप तहसील कार्यालय के शुभारंभ अनुसूचित जाति विकास प्राधिकरण के उपाध्यक्ष अउ सारंगढ़ के विधायक श्रीमती उत्तरी गणपत जांगड़े, छत्तीसगढ़ राज्य अनुसूचित जनजाति आयोग के सदस्य श्रीमती पद्मा घनश्याम मनहर के विशेष आतिथ्य म शुभारंभ होइस।
ए मउका जिला के कलेक्टर भीमसिंह भी मौजूद रिहिस। जानबा होवय के मुख्यमंत्री श्री भूपेश बघेल के 24 जनवरी ल रायगढ़ जिला के प्रवास दौरान क्षेत्र के जनता डहर ले कोसीर म उप तहसील शुरू करे के मांग करे गे रिहिस अउ मुख्यमंत्री ह इहां शीघ्र ही उप तहसील कार्यालय खोले के घोषणा करे गे रिहिस। अब इहां उप तहसील कार्यालय प्रारंभ होए ले क्षेत्र के 12 पटवारी हल्का के अंतर्गत 26 ग्राम पंचायत क्षेत्र के लोगन ल उंकर नजदीक ही राजस्व संबंधी कार्य म आसानी होही इहां 57 हजार ले जादा आबादी ल सुविधा होही। उप तहसील खुले ले क्षेत्रीय लोगन म खुशी के माहौल हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।