पाटन म आयोजित होइस तहसील स्तरीय गुरु घासीदास जयंती समारोह

अंजोर.दुर्ग। मुख्यमंत्री भूपेश बघेल आज दुर्ग जिला के पाटन म आयोजित तहसील स्तरीय गुरु घासीदास जयंती समारोह म शामिल होइन। ये मउका म ओमन लोगन ल गुरु घासीदास जयंती अउ छेरछेरा परब के बधाई दीस। मुख्यमंत्री श्री बघेल ह छत्तीसगढ़ के महादान परब छेरछेरा के म खुशी के इजहार करत बताइन के मेहा  स्वयं छेरछेरा मांग के कांकेर म एक लाख 24 हजार रुपिया ल अस्पताल म  समर्पित करे हवं। 

मुख्यमंत्री ह समारोह म संबोधित करत किहिन के गुरु घासीदास जी के मार्ग म चलत हम सामाजिक समरसता खातिर काम करत रइबोन। गुरु घासीदास जी के  संदेश सत्य अउ अहिंसा के रिहिस। ये साल हमन गुरु घासीदास जयंती के मउका म नया रायपुर म 10 एकड़ म गुरु घासीदास संग्रहालय स्थापना के घोषणा करेन। येकरे संग 200 सीटर आवासीय परिसर के घोषणा, जेमा अनुसूचित जाति के छात्र-छात्रा प्रतियोगी परीक्षा के तैयारी कर सकही। मिनीमाता डायग्नोस्टिक सेंटर के घोषणा के, जेकर माध्यम ले आम जनता के खातिर जांच के सुविधा आसान हो पाही। 

यशस्वी कलाकार देवदास बंजारे के नाम ले पंथी नृत्य पुरस्कार आरंभ करे गे हावय। पाटन ब्लॉक म एक करोड़ 91 लाख रुपिया के लागत ले अनुसूचित जाति बालिका छात्रावास बनाये जाही। मुख्यमंत्री ह ये मउका म सतनाम भवन के  लोकार्पण तको करिन। येकरे संग ओमन भवन म डोम शेड के घोषणा तको करिन। ये मउका मौके म पीएचई मंत्री गुरु रुद्र कुमार ह जैत खम्भ म पालो चढ़ाइस अउ किहिन के गुरु घासीदास जी के संदेश सामाजिक समरसता के हावय। मुख्यमंत्री भूपेश बघेल हमेशा ले सतनाम समाज के हित ल आगू बढ़ाये के दिशा म बुता करे हाबे।