उदंती सीतानदी टायगर रिजर्व गरियाबंद म तेन्दुआ खाल के तस्करी

अंजोर.गरियाबंद। राज्य के उदंती सीतानदी टायगर रिजर्व गरियाबंद के गठित एंटी पोचिंग टीम ह 2 नग तेन्दुआ खाल के तस्करी म 5 आरोपी के खिलाफ अपराध के प्रकरण दर्ज करके उंकर ले 2 तेन्दुआ खाल अउ 2 वाहन के जप्ती करे हावय। मिले आरो के मुताबिक येमा सामिल सबो 5 आरोपी मन उपर बड़का कार्यवाही करत जेल पठो के दे गे हावय।  वन अउ जलवायु परिवर्तन मंत्री मोहम्मद अकबर के निर्देश म राज्य म वन अपराध के रोकथाम के खातिर विभाग ह अभियान लगातार चलात हावय। प्रधान मुख्य वन संरक्षक (वन्यप्राणी) पी.व्ही. नरसिम्हा राव अउ मुख्य वन संरक्षक (वन्यप्राणी) राजेश पाण्डेय के मार्गदर्शन म उप निदेशक उदंती सीतानदी टायगर रिजर्व आयुष जैन के निर्देश म तस्कर ल पकड़े खातिर तत्काल एंटी पोचिंग टीम गठित करे गे हावय। ये टीम ह 27 जनवरी के रात्रि 7.30 बजे उदंती सीतानदी टायगर रिजर्व के अंतर्गत उत्तर उदंती मैनपुर परिक्षेत्र के बरगांव-जांगड़ा वन मार्ग म तेन्दुआ खाल के तस्करी म संलिप्त 5 आरोपी ल घेरा-बंदी करके पकडि़स हावय। आरोपी ले 2 नग तेन्दुआ खाल अउ संग म 2 नग मोटरसायकल वाहन के तको जप्ती होए हावय। 

जप्तशुदा तेन्दुआ खाल म ले एक तेन्दुआ खाल के लम्बाई एक मीटर अउ चौड़ाई 40 सेंटीमीटर व पूंछ 65 सेंटीमीटर अउ दूसर तेन्दुआ खाल के लम्बाई 84 सेंटीमीटर, चौड़ाई 35 सेंटीमीटर, पूंछ 50 सेंटीमीटर हावय। संलिप्त आरोपी म ग्राम जांगड़ा ले कैलाश जाति भुंजिया, परमानंद जाति रावत अउ योगेश जाति रावत अउ ग्राम बरगांव ले रामप्रसाद जाति रावत अउ मोहन यादव शामिल हाबे। उक्त कार्रवाई म वन परिक्षेत्र अधिकारी इंदागांव योगेश कुमार रात्रे, मिलनराम वर्मा, विमल प्रकाश टोपनो, चन्द्रबली धु्रव, लोचनराम निर्मलकर राकेश मारकण्डेय अउ मनोज कुमार धु्रव शामिल रिहिन।