छेरछेरा परब म मुख्यमंत्री के कांकेर जिला ल सौगात, सरोना अउ कोरर ल तहसील कोड़ेकुर्स अउ बड़गाँव ल उपतहसील के दर्जा

अंजोर.कांकेर। छत्तीसगढ़ के महादान परब छेरछेरा के मउका म मुख्य मंत्री श्री बघेल ह कांकेर जिला के मुख्यालय कांकेर के गोविंदपुर के हाईस्कूल मैदान म आयोजित आमसभा ल सम्बोधित करत आमजनता अउ जनप्रतिनिधी के आग्रह म क्षेत्र के विकास के खातिर केउ घोषणा करिन। भानुप्रतापपुर तहसील के उप तहसील कोरर अउ नरहरपुर तहसील के संग उप तहसील सरोना ल तहसील के दर्जा दे अउ दुर्गूकोंदल विकासखण्ड अंतर्गत कोड़ेकुर्से अउ कोयलीबेड़ा विकासखण्ड अंतर्गत बड़गाँव ल उपतहसील के दर्जा दे के घोषणा करिन। 

मुख्यमंत्री ह किहिन के जाड़ेकुर्से ले कोंडरूज के बीव बोहावत कोटरी नदी म उच्च स्तरीय पुल के निर्माण करे जाही अउ दुधावा बांध ले गंगरेल तक नहर निर्माण के खातिर सर्वे कराये जाही। जिला के सभी घोटुल के निर्माण अउ देवगुड़ी के खातिर 05-05 लाख रूपिया के स्वीकृति दीस। कांकेर के अलबेलापारा चौंक म शहीद गुण्डाधुर के प्रतिमा के स्थापना, कांकेर जिला म 83 करोड़ रूपिया के लागत ले  220 के.व्ही. उप केन्द्र के स्थापना, कांकेर शहर ले  गुजरत राष्ट्रीय राजमार्ग के चौड़ीकरण के खातिर 24 करोड़ रूपिया के स्वीकृति, कांकेर-भानुप्रतापपुर-संबलपुर मार्ग म 04 नग पुलिया निर्माण के खातिर 13 करोड़ के स्वीकृति, जिला खनिज न्यास निधि ले कांकेर जिला अस्पताल म ओपीडी, आईसीयू अउ इमरजेंसी वार्ड के खातिर पृथक विंग निर्माण के बर 7 करोड़ रूविया के स्वीकृति दीस। 

श्री बघेल ह पीढ़ापाल ले धनतुलसी 3 किमी पहुँच मार्ग के खातिर 4 करोड 38 लाख के स्वीकृति, कुरिष्टीकुर ले आलबेड़ा 5 किमी पहुँच मार्ग के खातिर 3 करोड़ 75 लाख के स्वीकृति, कांकेर नगर के शीतलापारा तालाब के सौंदर्यीकरण के खातिर एक करोड़ 17 लाख रूपिया के स्वीकृति, जिला मुख्यालय कांकेर म ठोस अपशिष्ट प्रबंधन के खातिर 80 लाख रूपिया के स्वीकृति अउ जिला खनिज न्यास निधि ले  निर्माण कार्यों खातिर 63 लाख रूपिया स्वीकृत करे के घोषणा करिन। सरंगपाल पुलिया ल स्वर्गीय श्री आत्माराम धु्रवा के नाम करे अउ गोविंदपुर म 20 लाख रूपिया के सामुदायिक भवन बनाये के घोषणा करिन।

येकर अलावा शासकीय हायर सेकेण्डरी स्कूल भानुप्रतापपुर म स्वामी आत्मानंद उत्कृष्ट इंग्लिश मीडियम स्कूल के स्थापना, 20 करोड़ रूपिया के लागत ले भानुप्रतापपुर-संबलपुर राज्य मार्ग के 15 किमी. सड़क के उन्नयन अउ  मजबूतीकरण, 20 करोड़ रूपिया के लागत ले भानुप्रतापपुर ले दुर्गुकोंदल, पखांजूर-बांदे मार्ग म 9 किमी सड़क के उन्नयन अउ मजबूतीकरण कार्य के स्वीकृति, चारामा विकासखण्ड अंतर्गत खैरखेड़ा ले गोटीटोला 7.50 किमी मार्ग के खातिर 14 करोड़ रूपिया के स्वीकृति, दमकसा ले पेटेचुआ 8 किमी. मार्ग पुल-पुलिया सहित 11 करोड़ के स्वीकृति, चारामा विकासखण्ड के ग्राम पंचायत म 3 करोड़ 50 लाख रूपिया के लागत ले केउ निर्माण के स्वीकृति अउ जिला खनिज न्यास निधि ले  निर्माण कार्य खातिर 1 करोड़ 25 लाख रूपिया स्वीकृत करे के घोषणा करिन।

ये मउका म विधानसभा के उपाध्यक्ष मनोज सिंह मण्डावी, वन मंत्री मोहम्मद अकबर, कांकेर जिला के प्रभारी मंत्री गुरू रूद्र कुमार, आबकारी अउ उद्योग मंत्री कवासी लखमा, संसदीय सचिव शिशुपाल शोरी, कोण्डागांव विधायक मोहन मरकाम, अंतागढ़ विधायक अनूप नाग, केशकाल विधायक संत राम नेताम, मुख्यमंत्री के संसदीय सलाहकार राजेश तिवारी, कमिश्नर बस्तर संभाग जी.आर.चुरेन्द्र, आईजी बस्तर संभाग सुन्दरराज पी., पुलिस उप महानिरीक्षक विनीत खन्ना, कलेक्टर चंदन कुमार, पुलिस अधीक्षक एम.आर अहिरे सहित स्थानीय जनप्रतिनिधि अउ  अधिकारीगण उपस्थित रिहिन।