सिनेमा। कोराना काल म अटके-फटके फिलिम मनके अब दिन बहुरना शुरू होगे हावय। जानबा होवय के गजेन्द्र श्रीवास्तव प्रोडक्शन के बैनर अउ मनीष मानिकपुरी के निर्देशन म बनत छत्तीसगढ़ी फिलिम ‘मार डारे मया म’ के ड्रामा ह तो पूरा होगे रिहिसे फेर गाना के काम अधुरा रिहिसे जेन अब फेर ले शुरू होगे हावय। मिले आरो के मुताबिक अनुज शर्मा के संग उडि़सा के अभिनेत्री लिप्सा मिश्रा ह छॉलीवुड के बड़का कोरियोग्राफर निशांत उपाध्याय के निर्देशन म प्रदेश के खूबसूरत लोकेशन म शूटिंग करत हावय।
छॉलीवुड के सुपरस्टार पद्मश्री अनुज शर्मा ह ये बात के आरो देवत सोशल मीडिया म फोटो शेयर करे हावय। जेन म ओमन लिप्सा के संग निशांत के निर्देशन म नृत्य कर दिखत हाबे। अनुज संग फिलिम के शूटिंग देखे खातिर ओकर परिवार के सदस्य म मां, पत्नी अउ दूनो बेटी मन तको पहुंचे हावय।
ये फिलिम म अनुज शर्मा अउ लिप्सा मिश्रा के अलावा क्रांति दीक्षित, पुष्पेन्द्र सिंह, अंजली सिंह, प्रदीप शर्मा, गिरवर दास मानिकपुरी, अंशु दास मानिकपुरी अउ निशांत उपाध्याय के तको दमदार भूमिका म हावय। फिलिम एक पारिवारिक कहानी म बनत हाबे जेला लिखे हाबे छत्तीसगढ़ के प्रसिद्ध लेखक गिरवर दास मानिकपुरी ह अउ संगीतकार हावय सुनील सोनी।
यहू ल पढ़व-
मार डारे मया म के नायिका लिप्सा मिश्रा के ये पहिली छत्तीसगढ़ी फिलिम आए। ओमन उडि़या भाषा के अनेक वीडियो एलबम अउ फीचर फिलिम म दमदार अदाकारी के जलवा देखा चुके हाबे। वेब सोर्स के मुताबिक लिप्सा मिश्रा के जनम ओडिशा के पुरी शहर म 15 जुलाई 1992 के होए हाबे। ओमन उत्कल संगीत महाविद्यालय अउ बीजेपी महाविद्यालय ले उच्च शिक्षा के संग ओडिसी नृत्य तको सीखे हाबे। उड़िया सिनेमा के छोटे पर्दा म ओकर आगमन टीवी शो के माध्यम ले होइस अउ बड़े पर्दा म 2015 म पहली फिल्म ‘माया’ रिलीज होइस जेमा अनु चौधरी अउ सुनील कुमार तको रिहिसे। उड़िया टेली सीरीज 'किच्ची लुहा पाई जाए ओथा' म खुशी के किरदार अउ 'तोह अगनारा तुलसी मु' म तुलसी के किरदार ले ओमन खूब लोकप्रियता हासिल करिन। आजकल लिप्सा मिश्रा ह उड़िया सिनेमा के अलावा हिन्दी, भोजपुरी अउ छत्तीसगढ़ी म तको बुता करत हाबे।
- फिल्म - मार डारे मया म
- प्रोडक्शन- गजेन्द्र श्रीवास्तव प्रोडक्शन
- निर्देशक- मनीष मानिकपुरी
- संवाद- गिरवर दास मानिकपुरी
- गीत- नवलदास मानिकपुरी
- संगीत- सुनील सोनी
- छायांकन- सिद्धार्थ सिंह
- कलाकार- अनुज शर्मा, लिप्सा मिश्रा, क्रांति दीक्षित, पुष्पेन्द्र सिहं, अंजलि सिंह, प्रदीप शर्मा, गिरवर दास मानिकपुरी, अंशु दास मानिकपुरी, निशांत उपाध्याय आदि।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।