गरिमापूर्ण होही गणतंत्र दिवस, कोरोना के सेती नइ होवय सांस्कृतिक कार्यक्रम

अंजोर.रायपुर। एसो तको गणतंत्र दिवस के आयोजन राज्य म गरिमापूर्ण तरीका ले मनाये जाही। राज्य शासन के निर्णय अनुसार ये साल कोनो प्रकार के सांस्कृतिक कार्यक्रम के आयोजन नइ करे जावय। समारोह म विशेष रूप ले कोरोना वारियर्स डॉक्टार, पुलिसकर्मी, स्वास्थ्यकर्मी अउ स्वच्छताकर्मी मनला सम्मानित करे जाही। 

आयोजन के दौरान कोविड-19 के बचाव खातिर सबो निर्देश के पालन अउ उपाए करे जाही। गणतंत्र दिवस समारोह के आयोजन म स्कूली छात्र-छात्रा मनला तको नइ बुलाये जाए। गणतंत्र दिवस 26 जनवरी के रात म प्रदेश के सबो शासकीय/ सार्वजनिक भवन/ राष्ट्रीय महत्व के स्मारक म रोशनी करे जाही। संग म सबो शासकीय अउ सार्वजनिक भवन म राष्ट्र ध्वज फहराये जाही। 

छत्तीसगढ़ शासन सामान्य प्रशासन विभाग डहर ले जारी आदेशानुसार राज्य स्तर म राजधानी रायपुर म आयोजित गणतंत्र दिवस समारोह म माननीय राज्यपाल सुश्री अनुसुईया उइके ध्वजारोहण करही। ध्वजारोहण के बाद पुलिस अउ अर्द्धसैनिक बल सलामी देही। जेकर बाद माननीय राज्यपाल के संदेश वाचन अउ कोरोना वारियर्स चिकित्सक, पुलिसकर्मी, स्वास्थ्यकर्मी अउ स्वच्छताकर्मी मनला सम्मानित करे जाही।