सारंगढ़ के ग्राम नंदेली म आयोजित अखिल भारतीय रामनामी महासभा बड़े भजन मेला म शामिल होइन मुख्यमंत्री भूपेश बघेल

अंजोर.रायपुर। मुख्यमंत्री भूपेश बघेल आज रायगढ़ जिला के सारंगढ़ विकासखण्ड के ग्राम-नंदेली म आयोजित अखिल भारतीय रामनामी महासभा बड़े भजन मेला म शामिल होके जयस्तंभ के पूजा-अर्चना करिन। ये मउका म मुख्यमंत्री ह कार्यक्रम म सारंगढ़ म 50 बिस्तर अस्पताल निर्माण, कोसीर ल उप तहसील बनाये अउ भडि़सार म जलाशय निर्माण के घोषणा तको करिन। मुख्यमंत्री श्री बघेल ह संत कबीर के दोहा मोको कहां ढूंढे बंदे, मैं तो तेरे पास में- के उल्लेख करत किहिन के रामनामी समाज के लोगन ह अपन शरीर म राम के नाम गुदवा करके कहीं बाहर ईश्वर ल खोजे के बजाए खुद म स्थापित करे हावय। रामनामी समाज के लोगन मन कठिन साधना करत हाबे। पूरा शरीर म राम के नाम गुदवात हाबे। ओढ़नी तको राम नाम के ओढ़त हावय। प्रदेश सरकार छत्तीसगढ़ के समृद्ध सांस्कृतिक विरासत ल संजोए, संवारे अउ आगू बढ़ाये के बुता करत हावय। लगभग 135 करोड़ खर्चा करके राम वन गमन पथ के निर्माण कराये जात हावय। जेमा एसो 9 जगह ल पर्यटन स्थल के रूप म विकसित करे जात हावय। 

ओमन आगू किहिन के रायगढ़ म स्थित जूट मिल ल चालू करे के दिशा म काम करे जात हावय। जेमा लोगन ल रोजगार मिले अउ बारदान होवइया किल्लत ल तको दूर करे जा सके। राजीव गांधी किसान न्याय योजना के तहत धान उत्पादक किसान ल लगभग 5750 करोड़ रूपिया के आदान प्रोत्साहन राशि सीधा उंकर खाता म जात हावय। योजना के तहत तीन किश्त म 4500 करोड़ रूपिया दिए जा चुके हाबे। चौथा किश्त 31 मार्च के पहिली दे जाही। ये मउका म उच्च शिक्षा मंत्री उमेश पटेल ह किहिन के मेला हमर एक समृद्ध सांस्कृतिक विरासत हावय। देश के आजादी ले पहिली ले आयोजित होवत ये मेला के 112 वां साल आए। रामनामी समाज के साधना सामाजिक मजबूती के संदेश देत हावय। कार्यक्रम खाद्य मंत्री अमरजीत भगत, विधायक सारंगढ़ श्रीमती उत्तरी गनपत जागड़े, विधायक रायगढ़ प्रकाश नायक, विधायक धरमजयगढ़ लालजीत सिंह राठिया, विधायक लैलूंगा चक्रधर सिंह सिदार सहित आन जनप्रतिनिधि अउ ग्रामीणजन उपस्थित रिहिन।