थाना राजपुर म अवइया मन खातिर बनिस जन प्रतीक्षालय

अंजोर.बलरामपुर। थाना राजपुर म अवइया-जवइया मनके बइठे खातिर जन सहयोग ले जन प्रतीक्षालय बनये गे हावय। पुलिस कोति ले मिले आरो के मुताबिक जन प्रतीक्षालय के उदघाटन समारोह म मुख्य अतिथि के रूप म चिन्तामणी महराज संसदीय सचिव छत्तीसगढ़ शासन अउ बलरामपुर रामानुजगज जिला पुलिस अधीक्षक रामकृष्ण साहु (भापुसे) विशेष रूप ले उपस्थित रिहिन।

ये मउका म कार्यक्रम ल सम्बोधित करत मुख्य अतिथि चिन्तामणि महाराज ह किहिन के ये पूरा बलरामपुर रामानुजगज जिला के थान बर रोल मॉडल होही। जन प्रतीक्षालय बनाये खातिर मुख्य अतिथि ह प्रत्येक थाना खातिर 100000 रुपिया के स्वीकृति करे के निर्देश तको दिस। ये कार्यक्रम म पुलिस अनुविभागीय अधिकारी कुसमी मनोज तिर्की,  थाना प्रभारी राजपुर अखिलेश सिंह अउ चौकी प्रभारी रजनीश सिंह सहित आन स्टाफ तको मौजूद रिहिन हाबे।