छत्तीसगढ़ म बर्ड फ्लू नइये, बालोद म मरे कौआ मनके रिपोर्ट आइस निगेटिव

अंजोर.रायपुर। छत्तीसगढ़ म बर्ड फ्लू के पुष्टि नइ होए हावय। बालोद जिला म 13 कौआ अउ 274 पक्षी के मरे म तुरते नमूना जांच खातिर उच्च सुरक्षा पशु रोग निदान प्रयोगशाला भोपाल भेजे गे रिहिसे। जिहां ले मिले रिपोर्ट म बर्ड फ्लू नइ पाये गे हावय।

संचालक पशु चिकित्सा सेवाएं के बताती बर्ड फ्लू ल सचरे ले रोके खातिर राज्य म हरसंभव एहतियाती उपाय करे जात हावय। पोल्ट्री फार्म अउ कुक्कुट प्रक्षेत्र म सरलग निगरानी रखे जात हावय। रोजाना सैम्पल तको सकेले जात हावय। राज्य के सबो सात शासकीय पोल्ट्री फार्म म 32 हजार पक्षी हावय, जोन स्वस्थ हावय। बर्ड फ्लू जांच खातिर छत्तीसगढ़ राज्य सले अब तक 467 नमून डब्ल्यूआरडीडीएल ल भेजे गे हावय। बालोद जिला के गिधाली गांव म बीते तीन दिन म 274 पक्षी के मरे के जांच खातिर सैम्पल भोपाल भेजे गे हावय। बालोद जिला म असामान्य रूप ले मरे मिले कौआ मनके जांच नमूना निगेटिव मिले हावय।

प्रदेश म ये रोग के प्रवेश ल रोके खातिर सबो अंतर्राज्यीय सीमा, प्रदेश के सबो 1042 निजी बॉयलर, 42 लेयर अउ 12 ब्रीडर कुक्कुट व्यवसायी, 7 शासकीय कुक्कुट फार्म अउ सबो जिला म अलर्ट जारी करे गे हावय। जिला के संवेदनशील क्षेत्र जइसे मुर्गी बाजार, मुर्गी फार्म, जलाशय अउ जंगली, प्रवासी पक्षी चाला क्षेत्र म निगरानी रखे के निर्देश दे गे हावय।