पुरातत्वीय स्मारक अउ संग्राहलय के विकास खातिर 4 संस्था ले अनुबंध, 10 करोड़ के प्रावधान

अंजोर.रायपुर। राज्य के संरक्षित स्मारक, उत्खनित पुरातत्वीय स्मारक, पुरखौती मुक्तांगन अउ राज्य के आन पुरातत्वीय स्थल के विकास अउ पर्यटक के सुविधा के खातिर आवश्यक अधोसंरचना निर्माण म 10 करोड़ रूपिया खर्चा करे जाही। संस्कृति विभाग येकर तइयारी शुरू कर दे हावय। संस्कृति मंत्री अमरजीत भगत के उपस्थिति म आज 4 संस्था ले अनुबंध करे गिस। अनुबंधित संस्था ह राज्य के पुरातात्विक स्मारक, स्थल अउ संग्राहलय के विकास के विस्तृत प्लान तइयार करही। 

जेन संस्था ले अनुबंध करे गे हावय ओमा वाप्कोस लिमिटेड, ब्राडकास्ट इंजीनियरिंग कंसल्टेट इंडिया लिमिटेड, टेलीकम्यूनिकेशन कंसल्टेंट इंडिया लिमिटेड अउ हिन्दुस्थान प्रीफैब लिमिटेड शामिल हावय। ये मउका म जशपुर विधायक विनय कुमार भगत, संस्कृति विभाग के सचिव डॉ. अन्बलगन पी., संचालक विवेक आचार्य सहित संस्कृति अउ पुरातत्व संचालनालय रायपुर के आन अधिकारी अउ चारों संस्था के प्रतिनिधि मौजूद रिहिन।