स्टील अउ आयरन उद्योग ल शत-प्रतिशत अनुदान : उद्योग मंत्री लखमा

अंजोर.रायपुर। वाणिज्य अउ उद्योग विभाग कोति ले बेमेतरा म आयोजित जिला स्तरीय कार्यशाला म कृषि मंत्री रविन्द्र चौबे अउ उद्योग मंत्री कवासी लखमा विशेष रूप ले शामिल होइन। ये कार्यशाला बेमेतरा जिला म औद्योगिक विकास के वर्तमान स्थिति अउ संभावना म चर्चा के उद्देश्य ले आयोजित करे गे रिहिसे। मंत्री लखमा ह ये मउका म मीडिया प्रतिनिधी ले चर्चा के करत किहिन के औद्योगिक नीति 2019-24 वर्तमान म छत्तीसगढ़ के औद्योगिक नीति दूसर विकसित राज्य ले बने हावय। जेमा स्टील अउ आयरन उद्योग ल जिला बेमेतरा म 100 प्रतिशत अनुदान के प्रावधान हावय। यकरे संग मंत्री ह छत्तीसगढ़ राज्य म होए 104 एमओयू के बारे म तको विस्तार ले जानकारी दीस। मंत्री लखमा ह किहिन के छत्तीसगढ़ राज्य म नवा उद्योग के स्थापना ले राज्य म पूंजी निवेश बढ़ही अउ बहुत बड़का संख्या म युवा मनला रोजगार मिलही। 

मंत्री लखमा ह बेमेतरा जिला म फूड पार्क निर्माण के प्रगति के तको जानकारी दीस। आगू ओमन किहिन के बेमेतरा जिला के प्रत्येक विकासखण्ड म फूडपार्क के स्थापना खातिर भूमि उद्योग विभाग ल प्राप्त हो चुके हावय। चंदनू व रवेली म फूडपार्क निर्माण के प्रस्ताव तको तइयार करा ले गे हावय। नवा औद्योगिक नीति ले जिला के विकास अउ स्थानीय निवासी ल रोजगार मिलही। ये कार्यशाला के आयोजन उद्योग विभाग डहर ले करे गे रिहिसे। जेमा कृषि मंत्री रविन्द्र चौबे, बीजापुर विधायक विक्रम मंडावी, बेमेतरा विधायक आशीष छाबड़ा के विशेष रूप ले शामिल होइन।