छत्तीसगढ़ बोर्ड परीक्षा के समय-सारणी घोषित, 10वीं के 15 अप्रैल ले अउ 12वीं के 3 मई ले

अंजोर.रायपुर। छत्तीसगढ़ माध्यमिक शिक्षा मण्डल कोति ले आयोजित होवइया बोर्ड परीक्षा के समय-सारणी आज घोषित कर दे गिस। छत्तीसगढ़ माध्यमिक शिक्षा मण्डल ले मिले आरो के मुताबिक कक्षा 10वीं के परीक्षा 15 अप्रैल ले 1 मई तक अउ कक्षा 12वीं के मुख्य परीक्षा 3 मई ले 24 मई तक होही। छत्तीसगढ़ माध्यमिक शिक्षा मण्डल को‍ति ले मिले आरो के मुताबिक मुख्य परीक्षा ऑफलाइन मोड म आयोजित करे जाही। जेकर बर उहीच स्कूईल ल परीक्षा केन्द्र बनाके, परीक्षा देके व्यवस्था करे जाही। परीक्षा केन्द्र म केन्द्र सरकार अउ राज्य सरकार के समय-समय म जारी कोरोना महामारी संक्रमण के बचाव के पालन करे जाना अनिवार्य होही। मुख्य परीक्षा के समय-सारणी मंडल के वेबसाइट www.cgbse.nic.in म उपलब्ध हावय।

प्रायोजना कार्य अउ प्रायोगिक परीक्षा 10 फरवरी ले होही। परीक्षा म सोशल डिस्टेंसिंग के पालन करत एक विषय के प्रायोगिक परीक्षा एक दिन म 2-3 शिफ्ट म आयोजित करे जाही अउ छात्र संख्या अधिक होए के स्थिति म आन दिन तको ले जाही। कोरोना महामारी के सेती प्रायोगिक परीक्षा म बाह्य परीक्षक के अनिवार्यता ल समाप्त करे गे हावय। यथासंभव 10 मार्च तक परियोजना कार्य अउ प्रायोगिक परीक्षा पूरा करा ले जाही। ये संबंध म सबो स्कूल खातिर निर्देश जारी करे हावय। 

अउ आन कक्षा 9वीं अउ 11वीं के परीक्षा स्थानीय स्तर म (होम एक्जामिनेशन) आयोजित करे जाही, अर्थात् छात्र अध्ययनरत स्कूल म ही परीक्षा देही, संबंधित स्कूल के ही परीक्षा के प्रश्न पत्र तइयार कराही। समय सारणी, मूल्यांकन, परीक्षा परिणाम संबंधित स्कूल स्तर म ही करे जाही। ये संबंध म तको अलग ले निर्देश जारी करे गे हावय।