पंडित सुंदरलाल शर्मा अउ ठाकुर प्यारेलाल सिंह के जयंती म उनला सुरता करिन सीएम बघेल

अंजोर.रायपुर। स्वतंत्रता संग्राम सेनानी, समाज सुधारक अउ प्रसिद्ध साहित्यकार स्वर्गीय पंडित सुंदरलाल शर्मा के जयंती 21 दिसम्बर म छत्तीसगढ़ के खातिर उंकर अमूल्य योगदान ल सुरता करत मुख्ययमंत्री भूपेश बघेल ह नमन करे हावय। श्री बघेल किहिन के पंडित सुंदरलाल शर्मा ह सामाजिक चेतना के आवाज हर घर तक पहुंचाये के अविस्मरणीय बुता करे हावय। छत्तीसगढ़ के ग्रामीण इलाका म फइले अंधविश्वास, छुआ-छूत, रूढिवादिता जइसे कुरीति ल दूरिहाये खातिर अथक प्रयास करिन। स्वतंत्रता संग्राम के बखत कई राष्ट्रीय आंदोलन ले जुड़े रिहिन अउ छत्तीसगढ़ म स्वाधीनता आंदोलन के मजबूती अउ जनजागरण खातिर गजब कोशिश करिन। ओमन किसान के अधिकार के लड़ाई के रूप म प्रसिद्ध कंडेल सत्याग्रह के प्रमुख सूत्रधार रिहिन।

मुख्यमंत्री श्री भूपेश बघेल ह स्वतंत्रता संग्राम सेनानी, स्वर्गीय ठाकुर प्यारेलाल सिंह के जयंती म तको ओमन ल नमन करिन हाबे। ये मउका म ओमन किहिन के ठाकुर साहब न सिर्फ गरीब के सेवा करिस बल्कि उंकर अधिकार खातिर जीवनभर संघर्ष करिन। ठाकुर प्यारेलाल सिंह छत्तीसगढ़ म सहकारी आंदोलन के पुरोधा के रूप म जाने जाथे। छात्र जीवन ले ही स्वाधीनता आंदोलन ले जुरे रिहिन अउ अत्याचार, अन्याय के विरोध म अपन आवाज बुलंद करिन। राजनांदगांव म मिल मजदूर मनला संगठित करके कुशल नेतृत्व प्रदान करिन।