पूर्व राज्यपाल अउ मुख्यमंत्री श्री मोतीलाल वोरा के निधन, मुख्यमंत्री ह व्यक्त करिन गहरा दुख

अंजोर.रायपुर। अविभाजित मध्यप्रदेश म दू बार मुख्यमंत्री अउ उत्तरप्रदेश म राज्यपाल रेहे वरिष्ठ कांग्रेस नेता श्री मोतीलाल वोरा के निधन होगे। श्री वोरा के काली 93 वां जन्मदिन रिहिसे अउ आज ये खबर के कोनो ल कल्पना नइ रिहिस के अइसन दुखद खबर सुनने ल मिलही। ये मउका म छत्तीसगढ़ के मुख्यमंत्री श्री भूपेश बघेल ह गहरा शोक व्यक्त करत श्रद्धांजलि अर्पित करिन हावय। श्री बघेल ह किहिन हावय के बाबूजी श्री मोतीलाल वोरा जी के जाना न केवल छत्तीसगढ़ बल्कि सरी कांग्रेस परिवार के खातिर एक अभिभावक के चले जाए जइसे हावय। जमीनीस्तर ले राजनीति शुरु करके राष्ट्रीय स्तर म ओमन अपन एक अलग पहचान बनाईस अउ आजीवन एक समर्पित कांग्रेसी बने रिहिन। उंकर जगह कभू नइ भरे जा सकही। मुख्यमंत्री श्री बघेल ह किहिन - मैं अपन राजनीति के ककहरा जेमन ले सीखेव ओमा बाबूजी एक रिहिस। अविभाजित मध्यप्रदेश ले लेके छत्तीसगढ़ तक वो हम कांग्रेस कार्यकर्ता खातिर एक पथ प्रदर्शक रिहिस। ईश्वर ओला श्रीचरण म स्थान देवय अउ परिवार ल ये कठिन समय म दुख सहे के शक्ति प्रदान करय।

श्री मोतीलाल वोरा के राजनैतिक जीवन

वर्ष 1968 म ओमन दुर्ग नगर निगम म पार्षद निर्वाचित होइन। वर्ष 1972 म पहली बार कांग्रेस ले विधायक बनिस। ओकर बाद 1977 अउ 1980 म तको विधायक निर्वाचित होइन। मध्यप्रदेश के तत्कालीन मुख्यमंत्री श्री अर्जुन सिंह ह ओला कैबिनेट मंत्री बनाइस। अऊ दू बार मध्यप्रदेश के मुख्यमंत्री बनिस। उत्तरप्रदेश के राज्यपाल अउ केंद्रीय मंत्री के रूप म तको ओमन दायित्व के निर्वहन करिन।