कलेक्टर वर्मा ह उदूप ले रात के पहुंचगे धान खरीदी केन्द्र, धान अउ बोरा तौलाई के करिस

अंजोर.राजनांदगांव। धान खरीदी सुरू होए के पहिली दिन ही जिला कलेक्टर टोपेश्वर वर्मा ह धान खरीदी रात 9 बजे जांच बर पहुंचगे। मिले आरो के मुताबिक ओमन डोंगरगढ़ विकासखंड के महाराष्ट्र सीमा ले लगे धान खरीदी केन्द्र म आकस्मिक निरीक्षण करत ग्राम चारभाठा, बागरेकसा, बोरतलाव अउ पनियाजोब के धान खरीदी केन्द्र के व्यवस्था के जायजा लिस।

श्री वर्मा ह धान खरीदी केन्द्र पनियाजोब के निरीक्षण करत उहां के ड्रेनेज व्यवस्था म लापरवाही देखके नाराजगी जाहिर करत निर्धारित मापदण्ड के पालन नइ करे अउ लापरवाही करे के सेती समिति प्रबंधक भीखमचंद जैन ल कारण बताओ नोटिस जारी करे के निर्देश दिस। ड्रेनेज दू लेयर म लगे होना चाहिए, ताकि धान ल नमी ले बचा सके। अइसन महत्वपूर्ण कार्य म कोताही नइ होना चाहि।

ओमन आगू धान खरीदी केन्द्र म बारदाना, टोकन, पेयजल, किसान मन खातिर आन सुविधा के आरो‍ लिस। कम्प्यूटर कक्ष म रखे नमी मापक यंत्र अउ धान के सैम्पल के तको अवलोकन करिन। ये मउका म एसडीएम डोंगरगढ़ अविनाश भोई, जिला केन्द्रीय सहकारी बैंक मर्यादित महाप्रबंधक सुनील वर्मा, जिला विपणन अधिकारी सौरभ भारद्वाज, एसडीओपी चंदे्रश ठाकुर, सहायक खाद्य अधिकारी मनीष चेतले, प्रभारी तहसीलदार प्रीति लारोकर, नायब तहसीलदार मनीषा देवांगन सहित आन अधिकारी उपस्थित रिहिन।