अंजोर.रायगढ़। कोतवाली पुलिस कोति बताये ले मुताबिक प्रदेश स्तर म ठगी रैकेट चलाने वाला गैंग के मुख्य सरगना निगम पंडा उर्फ सुजय चटर्जी ल जाल बिछाके गंगा नर्सिंग होम म नगदी रूपिया के साथ पकड़े गे हावय। ये गैंग ह शहर के नामचीन डॉक्टर बेद प्रकाश पटेल के बेटी के मेडिकल कॉलेज रिम्स झारखंड म एडमिशन कराये के नाम म 30,00,000 के डील करके डॉक्टर ले 26,68,020 रुपिया के धोखाधड़ी ले धरे के बाद 400000 लेना बाकी रिहिस। आरोपी ले नगदी 1,00,000, फर्जी आइडेंटी कार्ड अउ आन डॉक्यूमेंट के जब्ती करे गे हावय, कोतवाली पुलिस कोति ले आरोपी के दू दिन के पुलिस रिमांड ले गे हावय, ठग गैंग म शामिल आन आरोपी मनके पतासाजी खातिर दू टीम बनाके दिगर राज्य रवाना करे गे हावय।
पुलिस अधीक्षक रायगढ़ श्री संतोष कुमार सिंह ह 26 लाख के ठगी ल गंभीरता लेवत एडिशनल एसपी अभिषेक वर्मा अउ सीएसपी रायगढ़ अविनाश सिंह ठाकुर, कोतवाली टी.आई. एस.एन सिंह ले आरोपी के गिरफ्तारी अउ पतासाजी बर चर्चा करे रिहिन। दूसर कोति सायबर टीम पीड़ित पक्ष ले आरोपी के मोबाइल नम्बर लेके उंकर लोकेशन निकाल के अधिकारी ल अवगत करावत रिहिन।
आरोपी ले पूछताछ करके अपराध स्वीकृति बाद आरोपी ले एक लाख रूपिया नगद, 03 मोबाईल, डॉक्टर पटेल के बेटी के डक्युमेंट अउ 05 आईकार्ड जेमा 3 ID कार्ड म अलग-अलग नाम हाबे। आरोपी के थाना कोतवाली के अप.क्र. 926/2020 धारा 420, 34 भादंवि दर्ज अपराध म गिरफ्तार करके कोतवाली पुलिस कोति ले माननीय न्यायालय ले दू दिन के पुलिस रिमांड म ले हावय। आरोपी अउ ओकर साथी के बैंक एकाउंट आदि के जानकारी लेगे पुलिस टीम दिगर प्रान्त म पतासाजी करत हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।