नवोदय विद्यालय चयन परीक्षा के पंजीयन सुरू, 10 अप्रैल के होही परीक्षा
अंजोर.राजनांदगांव। कोरोना संक्रमण काल म तको अपन बुता ल पूरा करत नवोदय विद्यालय चयन समिति कोति ले 6वीं प्रवेश चयन परीक्षा के खातिर ऑनलाइन पंजीयन बुता सुरू कर दे हावय। येकर बर जिला के एकमात्र नवोदय विद्यालय डोंगरगढ़ के शिक्षक मन कोति ले जिला के सबो विकासखंड म जाके ऑनलाइन पंजीयन खातिर दिशा-निर्देश देवत हावय। इही कड़ी म पढ़ई तुंहर दुआर अभियान के तहत बच्चा मनके घर बइठे सुरक्षित अउ सतत् शिक्षा प्रदान करे म उल्लेखनीय उपलब्धि हासिल करइया मोहला विकासखंड म प्राचार्य संतोष सिन्हा, संतोष कुमार मंडल अउ अनिल कुमार पाल कोति ले पंजीयन के नियम, पोर्टल के स्थिति अउ परीक्षा पात्रता सम्बन्धी नियम ले सबो सीएसी ल अवगत कराये गिस। शिक्षक मंडल ह बताइन के पाछू साल म राजनांदगांव जिला पूरा देश म पंजीयन संख्या म अव्वल रहे हावय।
एसो पंजीयन खातिर 1 मई 2008 ले 30 अप्रैल 2012 जन्म तिथि वाला 5वीं म अध्ययनरत बच्चा परीक्षा दे खातिर पात्र हावय। परीक्षा 10 अप्रैल 2021 के आयोजित होही। जानबा होवय के मोहला के बच्च मनला शिक्षक के मदद ले शिखर कार्यक्रम के तहत नि:शुल्क कोचिंग तको देत हावय ताकि बच्चा ल परीक्षा खातिर गाइड लाइन मिल सके। संसदीय सचिव इन्द्रशाह मण्डावी, समाज सेवी संजय जैन, एपीसी सतीश ब्यौहरे अउ स्थानीय अधिकारी के मार्गदर्शन म प्रतियोगी परीक्षा खातिर बच्च मनला दिशा-निर्देश दिये जाथे।
कोई टिप्पणी नहीं:
टिप्पणी पोस्ट करें
जोहार पहुना, मया राखे रहिबे...