अंजोर.रायपुर। महिला अउ बाल विकास विभाग कोति ले प्रदेश के 27 जिला म संचालित सखी वन स्टॉप सेंटर म पाछू 2 बछर म 6 हजार 696 प्रकरण के निराकरण करे गे हावय अउ 3 हजार 694 प्रकरण म महिला मनला आसरा दे हावय। जानबा होवय के प्रदेश म पीड़ित व संकटग्रस्त महिला ल एक ही छत के नीचे आवश्यक सुविधा अउ सहायता उपलब्ध कराये के उद्देश्य ले सखी सेंटर के संचालन करे जात हावय। अब ये केन्द्र महिला मनला एक छत के नीचे तत्काल सहायता देके एक सशक्त अउ सुलभ माध्यम बनत हाबे।
महिला अउ बाल विकास मंत्री श्रीमती अनिला भेंड़िया ह किहिन के राज्य सरकार हर महिला के सुख-दुख म सहभागी हावय अउ हर संभव सहायता के खातिर तत्पर हावय। कतकोन मामला हाबे जेमा सखी सेंटर के माध्यम ले काउंसलिंग के माध्यम ले पति-पत्नि के बीच समझौता कराके उंकर गृहस्ती ल फेर ले बसाये म मदद करे गे हावय। समझौता नी होए के स्थिति म आवेदिका ल उंकर स्त्री धन लौटाये गे हावय। महिला मनला पुलिस, विधिक अउ मेडिकल सुविधा उपलब्ध कराये गे हाबे। दूसर प्रदेश म भटके महिला ल वापस लाने गे हावय। लड़ाई-झगड़ा के चलत घर ले रात म निकाल दे के स्थिति म महिला ल सुरक्षित आसरा दे गे हावय। निराश्रित अउ बीमार बुजुर्ग महिला मनके उपचार कराके सुरक्षित स्थान म भेजे गे हावय। ये सेंटर म सबो वर्ग, धर्म, संप्रदाय के महिला ल एक छत के नीचे उंकर जरूरत के अनुसार चिकित्सा, विधिक सहायता, मनोवैज्ञानिक सलाह, पुलिस सहायता,अस्थायी आश्रय, मानसिक चिकित्सा अउ परामर्श के सुविधा दे जात हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।