मुख्यमंत्री ह प्रधानमंत्री ल छत्तीसगढ़ ल प्राथमिकता के आधार म निःशुल्क कोविड-19 के टीका खातिर लिखिस चिट्ठी

अंजोर.रायपुर। मुख्यमंत्री श्री भूपेश बघेल ह छत्तीसगढ़ राज्य ल निःशुल्क अउ प्राथमिकता के आधार म टीका आबंटित करे के अनुरोध प्रधानमंत्री श्री नरेन्द्र मोदी ले करे हावय। ओमन प्रधानमंत्री ल भेजे पाती म किहिन हावय के छत्तीसगढ़ आदिवासी बाहुल्य राज्य हावय, ये सेती प्राथमिकता ले पहिली चरण म शामिल करत कोविड-19 के निःशुल्क टीका उपलब्ध कराये जाए। मुख्यमंत्री ह प्रधानमंत्री ले छत्तीसगढ़ राज्य के सहयोग खातिर तको धन्यवाद करे हावय।

मुख्यमंत्री ह प्रधानमंत्री ल लिखे पाती म किहिन हावय के कोविड-19 महामारी ले देश के भीतर लोगन म तनाव अउ भय के एक अभूतपूर्व स्थिति निर्मित होए हावय। देश के सबो आदमी के शांति अउ अच्छा स्वास्थ्य सुनिश्चित करना हमार सर्वोच्च कर्तव्य हावय। जइसे के हम सबो जानते हाबन, कोरोना वायरस ले जुड़े प्रकरण अउ मृत्यु के रोकथाम के खातिर कोविड-19 के टीकाकरण महत्वपूर्ण हावय। केन्द्रीय स्वास्थ्य मंत्रालय ह संकेत दे हावय के निकट भविष्य म वैक्सीन उपलब्ध होए के संभावना हावय जोन मानवता खातिर बड़का उपलब्धि आए।

मुख्यमंत्री ह अपन पाती म यहू तको बताये हावय के छत्तीसगढ़ आदिवासी बाहुल्य राज्य आए, ये सेती प्राथमिकता ले पहिली चरण म ही छत्तीसगढ़ ल शामिल करते हुए कोविड-19 टीकाकरण निःशुल्क उपलब्ध कराये जाए। कोविड-19 टीकाकरण कार्यक्रम के क्रियान्वयन के खातिर छत्तीसगढ़ राज्य पूरा तइयार हावय। ये टीकाकरण खातिर राज्य स्वास्थ्य कार्यकर्ता के अलावा पुलिस बल, राजस्व विभाग, शहरी विकास विभाग, ग्रामीण पंचायत विभाग के फंट लाईन वर्कर्स अउ मीडिया कर्मी जइसे कोरोना योद्धा ल तको शामिल करे के योजना हावय।