अंजोर.रायपुर। आईआईटी भिलाई के शैक्षणिक क्षेत्र कारिडोर के भूमिपूजन अऊ आन भवन के अधिरचना स्थापन कार्यक्रम आज उरकिस। ये मउका म मुखिया जी किहिन के भिलाई के शान म आज एक अउ सितारा जड़गे हावय। पंडित जवाहर लाल नेहरू के विजन ये भिलाई शहर के दुनिया भर म शान, मान अउ अभिमान हावय। पंडित नेहरू के सुरू करे आईआईटी के ये श्रृंखला भिलाई तक पहुंचगे हावय। भिलाई देश के तेईसवां आईआईटी हावय, ये हमार गौरव आए।
मुख्यमंत्री ह कार्यक्रम स्थल म सबले पहिली सुपर स्ट्रक्चर म ईंटा रखिन। तेकर पाछू मुख्यमंत्री ह शिला पट्ट अउ थ्री-डी मॉडल के अनावरण करिन। ये मउका म आईआईटी के फर्स्ट फेज के डिजाइन के संबंध म विस्तार ले जानकारी दीस। मुख्यमंत्री ह ये मउका म किहिन के आईआईटी के माध्यम ले छत्तीसगढ़ म रिसर्च ल बढ़ावा मिलही, जेन इहां लौह आधारित उद्योग के खातिर गजब उपयोगी होगी। ओमन किहिन के हमन छत्तीसगढ़ म धान आधारित एथेनाल उद्योग म बुता करने वाला हाबन। आईआईटी म यदि येकर कास्ट कटिंग म कोनो रिसर्च होते हावय तव ये उद्योग के खातिर यहू बहुत उपयोगी होही।
कार्यक्रम म गृह मंत्री ताम्रध्वज साहू ह किहिन के नेहरू जी ह भिलाई स्टील प्लांट के सौगात हमर प्रदेश ल दीस जेकर तेजी ले विकास होइस अब आईआईटी भिलाई के माध्यम ले तको छत्तीसगढ़ म विकास के नवा संभावना खुलही। आगू कृषि अउ जल संसाधन मंत्री रविंद्र चौबे ह किहिन के मुख्यमंत्री श्री भूपेश बघेल के नीति ले कोरोना काल म तको छत्तीसगढ़ के अर्थव्यवस्था मजबूत बने हाबे। ओमन किहिन के किसान ल खुशहाल करे के माध्यम ले हर वर्ग ल खुशहाल करे जा सकत हावय ये नीति सफल रहिस अऊ येकर श्रेय मुख्यमंत्री ल जाथे। ये मउका म उच्च शिक्षा मंत्री श्री उमेश पटेल, पीएचई मंत्री श्री गुरु रुद्रकुमार, राज्यसभा सांसद सुश्री सरोज पांडे, भिलाई विधायक अउ महापौर देवेंद्र यादव, कलेक्टर डॉ. सर्वेश्वर नरेन्द्र भूरे, एसपी प्रशांत ठाकुर मन तको रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।