भिथिडीह महासमुंद के पशु चिकित्सा शिविर म 65 पशु के होइस फोकट म जांच अउ उपचार

अंजोर.महासमुंद। पिथौरा विकासखण्ड के वनांचल ग्राम भिथिडीह म पशुधन विकास विभाग डहर ले निःशुल्क पशु चिकित्सा शिविर के आयोजन करे गे रिहिसे। जेमा उपस्थित पशुधन विकास विभाग के उप संचालक डॉ डी.डी. झारिया के मार्गदर्शन म गाय, भैंस, बकरी म सामान्य पशु उपचार, औषधि वितरण, कृमिनाशक दवापान, जू किलनी नाशक दवा, बधियाकरण करे के संग पशु मनके पहचान खातिर कान म टैगिंग बुता तको करे गिस। पशु चिकित्सा विभाग के डॉ डी.एन. पटेल डहर ले पशुपालक ल पशु प्रबंधन अउ बने दूध उत्पादन खातिर हरियर चारा उत्पादन अउ विभागीय योजना के संबंध म विस्तारपूर्वक ल जानकारी प्रदान करे गिस। शिविर म 65 पशु के जांच अउ उपचार, 108 पशु ल कृमिनाशक दवा दिये गिस। ये शिविर म पशु चिकित्सा विभाग ले गोपाल चन्द्र भोई, विष्णुराम साहू, भरतलाल यादव, शंकर रात्रे के विशेष योगदान रिहिस।