जैतखाम म पालो चघा के पामगढ़वासी मनला गुरु घासीदास जयंती के बधाई दीस सीएम बघेल

अंजोर.जांजगीर। मुख्यमंत्री भूपेश बघेल ह विकासखंड पामगढ़ म आयोजित गुरु घासीदास जयंती समारोह म शामिल होइन। मुख्यमंत्री ह पामगढ़ के जैतखाम म पहुंच के बाबा गुरु घासीदास जी के पूजा अर्चना करिन अउ जैतखाम म परिक्रमा करके पालो चढ़ाइन। ये मउका म उंकर संग नगरीय प्रशासन मंत्री डॉ. शिव कुमार डहरिया, लोक स्वास्थ्य यांत्रिकी अउ ग्राम उद्योग मंत्री गुरु रुद्रकुमार तको शामिल होइन।

कार्यक्रम म मुख्यमंत्री ह किहिन के बाबा गुरु घासीदास के कहे आदर्श वाक्य मनखे मनखे एक समान ल आत्मसात करे ले ही मानव जीवन के कल्याण हो सकत हावय। ओमन किहिन के सबो मानव ल एक समान मानत राज्य सरकार बिना भेदभाव के सबो वर्ग के लोगन के हित म काम करत हावय अउ बाबा जी के आदर्श अउ नैतिकता के रास्ता म चलत प्रदेश सरकार ह सफलता ले 2 बछर पूरे करे हाबे। ओमन किहिन के सबो वर्ग के हित ल ध्यान म रखके राज्य सरकार योजना बनात हावय। मुख्यमंत्री ह पामगढ़ म सभा ल सम्बोधित करत सरी जनता ल राज्य अउ देश के विकास म भागीदार बने के अपील तको करिन।