अंजोर.रायपुर। रायपुर धमतरी रोड म अभनपुर ब्लॉक ग्राम कोलर के पारले-जी बिस्किट कंपनी प्रबंधक के खिलाफ 2 दिसंबर के छत्तीसगढि़या क्रान्ति सेना कोति ले जबर गोहार आंदोलन करे जाही। मिले आरो के मुताबिक कंपनी मालिक शिव स्नेक्स अउ आकृति स्नेक्स के विरोध म क्रान्ति सेना के संग स्थानीय मजदूर मन प्रर्दशन करही।
जानबा होवय के पाछु दिन तको सेनानी अउ गांव वाले मन कंपनी के प्रबंधक के खिलाफ विरोध दर्ज कराये रिहिन हाबे। अभनपुर ब्लाक के ग्राम कोलर म चलत बिस्किट कंपनी म स्थानीय मजदूर मनके शोषण अउ दुर्व्यवहार म प्रशासन के हस्तक्षेप नइ करे के सेती अब मामला अउ बड़का होवत हाबे। एजेंसी कोति ले बताये गे हाबे के स्थानीय मजदूर मनला बिगर कोनो कारण के काम ले निकाल देथे अउ उंकर जगह म आन राज के मनखे मनला रखे जाथे।
स्थानीय मजदूर मनके रोजगार छिनना अउ आन राज के मनेख मनला भरे के विवाद म कई पइत प्रबंधक ले सेनानी मन गोठबात करे के कोशिश करिन फेर ओमन नजर अंदाज करके बाहरी मजदूर ल लानतेच हावय। प्रदेश मीडिया प्रभारी देवहीरा लहरी के बताती 22 नवंबर के ग्राम कोलर के शीतला तरिया म बइठक करके बड़का आंदोलन के रणनीति बनाई गिस। उही मुताबिक बुधवार 2 दिसंबर के कंपनी प्रबंधक के खिलाफ जबर आंदोलन करे जाही। प्रदेश उपाध्यक्ष डॉ अजय यादव अउ रायपुर जिला शहर संयोजक धनुक साहु मनहा ग्राम कोलर म मोटरसाइकिल रैली निकाल के तिर-तखार के गांव के लोगन, जनप्रतिनिधी मनला आंदोलन म शामिल होए के अपील करे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।