हैप्पी सीडर यंत्र ले बिना पराली जलाए होही गेहूं के बुवाई

अंजोर.रायपुर। कृषि विभाग कोति ले खेत म पराली न जलाके सीधा बीजा के बुवाई करे खातिर हैप्पी सीडर यंत्र के अभिनव प्रयोग करे जात हावय। ये यंत्र ले पराली ल बिना जलाए खेत म गेहूं बीज के सीधा बोवाई करत हावय। बलौदाबाजार जिला के विकासखण्ड पलारी के ग्राम लटेरा म 25 हेक्टेयर म हैप्पी कृषि यंत्र कोति ले गेहूं के बोवाई करे जात हावय।

बलौदाबाजार जिला के किसान मनला पराली जलाये ले रोके अउ गौठान म पैरा दान करे खातिर जिला प्रशासन कोति ले अभियान चलाये जात हावय। जिला के कई गांव के किसान ह 5 हजार कोंटल ले जादा पैरा गौठान म दान करे हावय। बताये गे हावय के विकासखण्ड बलौदाबाजार के आदर्श गौठान पुरेना खपरी म बेलर मशीन के माध्यम ले 120 क्विंटल पैरा अउ ग्राम सकरी के गौठान म 192 क्विंटल पैरा एकत्र करे गे हावय। अइसने विकासखण्ड पलारी के आदर्श गौठान टीला म 79 क्विंटल अउ हरिनभट्ठा म 108 क्विंटल पैरा एकत्रित करे जा चुके हावय।