अंजोर.धमतरी। मोबाइल अउ लैपटॉप उक के इलेक्ट्रॉनिक समान के दुकान म चोरी करइया घोड़ासहन मोतिहारी के शातीर गैंग के 7 सदस्य ल पकड़े हावय धमतरी पुलिस ह। पाछू दिन राष्ट्रीय राजमार्ग के विकास मोबाइल दुकान ले 136 नग मोबाइल अउ आन इलेक्ट्रॉनिक समान के चोरी होए रिहिसे जेकर कुल कीमत 19,48,000 रुपिया बताये गे हावय। पुलिस ह डॉग स्काड अउ फिंगरप्रिंट एक्सपर्ट के मदद ले जांच करिन तव पता चलिस के दुकान के चोरी म 9 सदस्य रिहिसे जेन मन घटना ल अंजाम दे के बाद बस ले रायपुर रवाना होगे। साइबर सेल के मदद ले आखिर पुलिस ह सात आरोपी ल पकड़े म कामयाब होगे। जानबा होवय के ये चोरहा मन आन राज के आए अउ छत्तीसगढ़ म केऊ जगह चोरी कर डरे हाबे।
मोतिहारी बिहार के ये चोरहा मन गजब शातिर हाबे, रेकी करे के बाद घटना ल अंजाम देथे। पुलिस ह गिरोह के सरगना गोविंद चौधरी पिता मिश्रीलाल चौधरी धरमपट्टी राधोपुर सुपौल बिहार संग दिनेश पासवान पिता राजकुमार पासवान घोड़ासहन भगवानपुर कोटवा ईस्ट चंपारण बिहार, भरत भूषण पवन पिता संकरदास टोले घोड़ासहन ईस्ट चंपारण बिहार, योगेंद्र प्रसाद पिता विश्वनाथ प्रसाद घोड़ासहन ईस्ट चंपारण बिहार, रामबाबू राय पिता शंकर राय बिजबनी जितना बिहार, श्रीराम साह पिता रामेश्वर साह बरियारपुर मोतिहारी ईस्ट चंपारण बिहार, राजेश्वर दास पिता स्व बिगू दास पकईटोला घोड़ासहन ईस्ट चंपारण बिहार ल गिरफ्तार करे हाबे। आरोपी मन तिर ले 89,199 रुपिया नगद अउ 9 मोबाइल सेट पेपर कटर, सब्बल, चादर, जैकेट, बैग अउ चाबी तको बरामद होए हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।