धान बेचे बर लउहा झिन लेवा, तीन पइत टोकन कटही : कलेक्टर धमतरी

अंजोर.धमतरी। कुरूद विकासखण्ड के ग्राम कोलियारी (भखारा) म आज नवा धान उपार्जन केन्द्र के शुभारम्भ के संग धान खरीदी शुरू होइस। जिला कलेक्टर जयप्रकाश मौर्य संग अउ जनप्रतिनिधि मन किहिन के मुख्यमंत्री भूपेश बघेल के नेतृत्व म प्रदेश सरकार हर किसान ले धान के एक-एक दाना खरीदही। येकर बर सरकार के सबो तियारी हाबे। ये मउका म ओमन किसान मनला किहिन के धान बेचे बर जादा लउहा झिन लेवा, सबो पंजीकृत किसान के धान खरीदे जाही।

छोटे किसान ल एक बार, मध्यम के दू अउ बड़े किसान के तीन बार टोकन जारी करे जाही, फेर बार-बार लाइन म लगे के जरूरत नइये। पहली बार म ही उंकर धान ले के तिथि निर्धारण कर दे जाही, जेहा सूचना पटल म तको लिखाये रिही। धान के गुणवत्ता परखे खातिर स्थानीय स्तर म ही समिति गठित होही। ये मउका म वरिष्ठ नागरिक शरद लोहाणा, जिला पंचायत उपाध्यक्ष नीशु चंद्राकर अउ जिला पंचायत सदस्य श्रीमती तारिणी चंद्राकर, नगर पंचायत भखारा पार्षद श्रीमती संतोषी निषाद, नगर पंचायत भखारा के पूर्व अध्यक्ष भरत नाहर उक मन तको रिहिन।